ICity iphinde yakhala ngaphansi esimangalweni sayo ngePSL
Imidlalo yeBetway Premiership izoqala njengobabbekuhleliwe ngoMgqibelo ngemuva kokuthi umahluleli eSafa eluchithile udaba lweCape Town City.
Lokhu kuqedile impi yaleli qembu yezomthetho yokuzama ukuhlala kulesi sigaba — okungenani okwamanje.
Bekuke kwavela ukuthi ukuqala kwesizini ka-2025/26 kungase kumiswe njengoba iCity ibisalwela ukugcina indawo yayo kwiPremiership.
Beyidlulise isinqumo esakhishwa yikomidi lePSL eliqondisa ubugwegwe sokuhlawulisa iMarumo Gallants ngokulahlwa yicala lokudlalisa umdlali ongabhalisiwe ngendlela efanele.
Ngokwayo, isigwebo bekumele kube ngesokuthi iGallants iphucwe wonke amaphuzu ewathole emidlalweni ayidlalile lo mdlali.
Lokhu bekulandela ukuthi iGallants idlalise uMonde Mphambaniso emidlalweni engu-26 yeligi ngesizini edlule ebe ebhaliswe ngendlela engeyiyo.
IGallants itholwe inecala lokusebenzisa incwadi yokukhulula lo mdlali engafenele ukumbhalisa.
Nokho ikomidi lePSL lanquma ukuthi ihlawuliswe imali engu-R200 000 – ingenye yayo elengisiwe – kanti umdlali yena wathola engenacala.
ICity beyibheke ukuthi umxazululi oqokwe yiSafa, uHilton Epstein uzovuna yona bese imisa ukuqala kwemidlalo yeGallants.
Kodwa ngoLwesihlanu umahluleli uvumelane nekomidi lePSL, yagqemeka olunye udume iCity njengoba ethe kufanele ikhokhele nezindleko zonke zaleli cala.
Ngesikhathi ilinde isinqumo sikamahluleli, iCity beyifake isixwayiso eNkantoko ePhakeme yaseGoli ukuthi izofaka isicelo esisheshayo sokumiswa kwemidlalo uma umxazululi evuna yona.
Kodwa iphoxekile ngoLwesihlanu ebusuku ngesikhathi isinqumo siyishwebisa, inkantolo yavumela iPSL ukuthi iqhubeke nezinhlelo zayo ngemidlalo yeligi.
FUNDA NALA | IBAFANA IDAZE INKANI KWAYILUNGELA KOWE_CHAN
I-City isenalo ithuba lokuyofuna usizo enkantolo yamazwe ngamazwe yamacala ezemidlalo, iCourt of Arbitration for Sport (Cas).
Nokho lokhu kungasho ukuthi ikhiphe imali eningi futhi kuthathe isikhathi eside ukuthi udaba lwayo luxazululeke – nakhona ayiqinisekisiwe ukunqoba.
Imidlalo yeMotsepe Foundation Championship, lapho iCity yehliselwe khona, izoqala ngo-Agasti 22.
