Uxolisile, wesula oweBafana ‘owaphoxa’, ukhonjwa kwelaseKZN
Umhlaziyi we-Bafana Bafana, uSinesipho Mali, usexolisile emphakathini waseNingizimu Afrika ngenkulumo eyadala umsindo ngemuva kokuthi iqembu lifinyelele esigabeni somkhumulajezi kwiNdebe yoMhlaba.
Ngaleso sikhathi uMali wayethe: “Abanye bahleli emakhaya bayakhuluma, thina silapha senza umsebenzi.
“Yilowo umehluko. Lena yiNdebe yoMhlaba yesibili, sesifike esigabeni esikhulu. Mabaqhubeke bakhulume.”
Ekhuluma kwiSports Nights Amplied kwiMetro FM ngoLwesine ebusuku, uMali ufunde isitatimende abesibhale phansi, wavuma ukuthi wenza iphutha.
“Ngikhuluma kini namuhla ngokuzithoba, futhi sengicabangisise kahle,” kusho yena.
“Okokuqala ngifuna ukuxolisa kubantu baseNingizimu Afrika, kubalandeli beBafana Bafana, kwiSafa, kozakwethu, kubadlali, kubaqeqeshi, kwabezindaba nakubo bonke abacasulwa amazwi ami.”
Uthe imizwa yamhlula ngemuva komdlalo kodwa lokho akusona isizathu salokho okwenzeka.
“Ukumela iNingizimu Afrika kudinga ukuvuthwa, ukuziphatha nokuhlonipha ngaso sonke isikhathi,” kuqhuba yena.
“Bengingakhetha amagama angcono futhi ngiyalithatha lonke icala.”
Uphinde wathi yize wayengahlosile ukweyisa muntu, uyaqonda ukuthi amazwi akhe aphazamisa abantu abaningi futhi aphambanisa ukunakwa kwempumelelo yeqembu.
UMali uphinde waveza ukuthi uthole izinsongo ezithinta yena nomndeni wakhe, okuyinto athe imphoxe kakhulu.
Ubuye wavuma ukuthi ukugxekwa kuyingxenye yebhola nokuthi abalandeli banelungelo lokubuza imibuzo.
Ekupheleni kwesitatimende sakhe, umemezele ukuthi useyishiyile indima yakhe njengomphathi wezokuhlaziya ukusebenza kwe-Bafana Bafana.
“Ngiyaqinisekisa ukuthi ngeke ngisaqhubeka njengomphathi wezokuhlaziya ukusebenza kweBafana Bafana.
“Lesi yisinqumo engasithatha ezinyangeni ngaphambi kweNdebe yoMhlaba,” kusho yena.
- FUNDA NALA | ISundowns ibuyisa uRibeiro
ILisenethini ithole ngokukhetehkile ukuthi uMali uzojoyina AmaZulu FC, lapho ezosebenza khona ngaphansi komqeqeshi u-Arthur Zwane.
- EZISHISAYO| Cofa lapha usithole kuWhatsApp
