IGalaxy iphinde yagadla kwiChiefs ngaphambi koweCarling KO

I-TS Galaxy iphinde yazifaka zaphelela kwi-Kaizer Chiefs ezogadulisana nayo emdlalweni weCarling Knockout Cup ngoLwesibili ebusuku.

Lamaqembu azobhekana eFNB Stadium ngoLwesibili ngo-7 ebusuku. Selokhu zaqhathwa, iGalaxy ibilokhu iwangcofa Amakhosi.

NgoMsombuluko iRockets ibuyele ezinkundleni zokuxhumana iyochukuluza lezi zimbangi zayo zaseNaturena.

Ithe sekuyohlanganwa esiqiwini (eFNB Stadium) la ibhubesi liyiphuma khoma umsila ungaphansi kwemilenze seliphoxekile.

“MD-1 Carling Black Label Round of 16. Umdlalo omkhulu kusasa kuzobaleka 19:00 FNB Stadium (Zoo),” kubhala leli qembu.

Liqhubekile nangoLwesibili emini, lafaka isithombe sebhubesi licuthele idube, lona lazibiza ngebhubesi, iChiefs lathi iyidube elizulelwa amanqe.

Bekungekhonake okokuqala i-TS Galaxy idedela amagabade iwabhekise kwi-Kaizer Chiefs njengoba ike yakwenza nangesonto elidlule.

Ngemuva nje kokuqhathwa kweChiefs neGalaxy kwiCarling Knockout, leli qembu laseMpumalanga lafaka isithombe sembongolo izibuka esibukweni.

Okukhangayo ngalokhu wukuthi le mbongolo izibona iyibhubesi esibukweni.

Umphathi weGalaxy uTim Sukazi uthi wathola umlayezo kamakhalekhukhwini uvela esikhulwini saMakhosi uJessica Motaung embuza ngalokhu.

Nokho uSukazi uthi akazange aphendule ngoba lokhu yena ukubona kuwukungcweka nje kwamaqembu ngaphambi komdlalo futhi akakuboni okubi ngakho.

Lokhu ‘kuchwensa’ kwe-TS Galaxy ezinkundleni zokuxhumana, idelela i-Kaizer Chiefs nokho sekunyuse isasasa ngalo mdlalo walamaqembu.

Abaningi sebebheke ukubona ukuthi izothini uma kwenzeka izinduku ziyidida eFNB Stadium, kube yiyo ephuma ihlehla.

Abanye babheke ukuthi izogiya kanjani ke uma kwenzeka kuyilungela, kube yiyo enqobayo kulo mdlalo.