ISiwelele izihlela kabusha, isayine abayisikhombisa

I-Siwelele FC iyaqhubeka nokuba matasa emakethe yabadlali njengoba lizihlela kabusha ukulungiselela isizini ezayo.

Seyisayine umdlali wasesiswini waseLesotho uNeo Mokhachane ngaphambi kwesizini entsha yeBetway Premiership.

Lo mdlali oneminyaka engu-29 ubudala ujoyina leli qembu mahhala ngemuva kokushiya iqembu laseBotswana, iJwaneng Galaxy.

UMokhachane usengomunye wabadlali abasha asebejoyine iqembu likaLehlohonolo Seema, kulandela ukufika kukanozinti waseBotswana uGoitseone Phoko osayine inkontileka yeminyaka emibili.

USeema udalule ukuthi sebefinyelele kubadlali abayisikhombisa abasha kuze kube manje, kanti kuseza nabanye ababili abagadli bakwamanye amazwe.

“Kukhona nabagadli ababili bakwamanye amazwe abasendleleni,” kusho uSeema kwiSoccer Laduma.

Kubikwa ukuthi umgadli waseGhana uHamza Issah uzofika kwi-Siwelele FC ngokubolekiswa esuka kwiHearts of Oak.

Leli qembu liphinde lathatha abadlali abathathu kwiMangaung United, okunguKwanda Lupalule, Felix Noge noRehloholofaditswe Thulo.

ISiwelele ibiphoqelekile ukuthi izigcwalisele izikhala ngenxa yokulahlekelwa abadlali abambalwa ababalulekile.

UGamphani Lungu, uBohlale Ngwato noNeo Rapoo sebejoyine i-Orlando Pirates, kanti uGape Moralo ukhonjwa kuMaZulu FC.

• FUNDA NALA | UMbokazi kwabaphambili kwiNdebe yoMhlaba

Leli qembu liphinde lahlukana noKgaogelo Sekgota, kanti ikusasa likaMaloisane Mokhele nalo lisangabazeka njengoba inkontileka yakhe iphela ngoJuni 30.

Khonamanjalo, umdlali wasemuva uNyiko Mobbie kulindeleke ukuthi ashiye kwi-Siwelele ajoyine iSekhukhune United.

• EZISHISAYO| Cofa lapha usithole kuWhatsApp