Amajita alwile, kwashoda yona inhlanhla eNdebeni yoMhlaba
NguNjabulo Shezi
Iqembu lesizwe laseNingizimu Afrika labadlali abaneminyaka engaphansi kuka-20, Amajita, libe nomdlalo wempi libhekene nelaseFrance kwiFifa Under 20 World Cup esingethwe eChile.
Amajita abenomdlalo wokuvula lapho esebenze khona kahle kodwa-ke imiphumela yagcina ivune amaBleuets aseFrance enqoba ngo2-1.
Igoli lika-Anthony Bermont elingene ngomzuzu ka-25 yilona elibeke iFrance phambili emdlalweni obuse-Estadio El Teniente, eRancagua.
UJody Ah Shene uphendule ngomzuzu ka-33 ngemuva kokuvalela phakathi iphenathi.
Zibuyile ngesiwombe sesibili iFrance obekulindelwe ngabaningi ukuthi izidlele amahlanga, nokho akubanga lula.
Kuze kwaqhamuka Lucas Michal lowo washaya igoli lesizbili ngemizuzu yokugcina, ngemuva kweziwombana ezimbili efika efikile Amajita emapalini eFrance.
Umqhudelwano wakulokhu ungahlelwanga ngezinsuku zomhlabakhefu weFifa, amaqembu amaningi akuthole kuba nzima ukudedela abadlali bawo ngenxa yokuthi amaligi ayaqhubeka nokudlala.
WINA | Ithuba lokuwina neVicks neLisenethini
Umqeqeshi weFrance uBernard Diomède ukuvezile ukuthi iqembu lakhe lidlala ngaphandle kwezibabuli zakhe ezalala isibili kwi-Under 19 European Championship nyakenye.
Kodwa yize kunjalo uthi lisakhona ithalente kubafana abatomule kwiLuague 1 nakwamanye ase-Europe.
FUNDA NALA | UCarnell ufuna umqeqeshi wakuleli azomsiza e-US
Noma kunjalo izinsizwa zikaRaymond Mdaka ezingompetha base-Afrika bezilokhu ziyifakile ingcindezi.
Lokhu kuzokwenza babe nokuzethemba okuphindiwe emidlalweni elandelayo ezowudlala neNew Caledonia ngoLwesine ngo-1 ekuseni ngokwesikhathi sakuleli, ne-USA ngeSonto.
