I-Orlando Pirates ibophele eliqinile koweLupopo
I-Orlando Pirates isilimemezele iqembu layo elizoqala umdlalo womlenze wokuqala weCaf Champions League.
Izohlangana neSt Eloi Lupopo yaseDemocratic Republic of Congo eStade Kibassa Maliba ngeSonto ntambama. Umdlalo uqala ngo-3.
AmaBhakabhaka awakaze ahlulwe emidlalweni engu-11 kuyo yonke imiqhudelwano kule sizini futhi abheke ukudlulela esiganeni samaqoqo kulo mqhudelwano.
I-Orlando Pirates idlule kwiLioli FC yaseLesotho ngo 7-0 sekuhlanganiswe imiphumela esigabeni sokuqala, kwathi iLupopo yahlula i-Al-Merrikh ngo 1-0 ukuze idlulele phambili.
Njengoba ihluleke kweyandulela owamanqamu ngesizini edlule, ihlulwa yiPyramids FC, iPirates izimisele ngokwenza kangcono kulokhu.
WINA | Imali yokuqala ibhizinisi lezemfashini neNikNaks
Umqeqeshi, u-Abdeslam Ouaddou ubophele iqembu eliqinile njengoba ebuyisele nokaputeni uNkosinathi Sibisi eqenjini eliqala imidlalo.
FUNDA NALA | IYanga igxale uFolz, izoqasha uNabi?
Uthathe indawo kaLebone Seema obesevamise ukuqala, adlale ngokubambisana noMbekezeli Mbokazi emuva maphakathi nenkundla.
Phambili uqalise u-Evidence Makgopa obe nomdlalo omuhle kwiBafana Bafana phakathi nesonto.
- Ibophele kanje iPirates: Chaine – Hotto, Lebitso, Mbokazi, Sibisi – Moremi, Sebelele, Nduli, Nemtajela, Mbule – Makgopa.
- Ebhentshini: Dladla, Xoki, Seema, Ndlozi, Ndaba, Mariko, Mbatha, Maswanganyi, Appollis, Mabasa.
