Izodla izigidi iPirates ngoMbokazi okhonjwa e-US
Umdlali wasemuva we-Orlando Pirates uMbekezeli Mbokazi usehambele phesheya ukuyoqedela isivumelwano sokusayona eqenjini le-US Major League Soccer iChicago Fire.
Intatheli edumile ephind eibe ngumsakazi weSuperSport TV, uMark Gleeson yiyo eqinisekise ukuthi iChicago Fire yiyo iqembu elifuna lo mdlali.
Lokhu bekulandela ukuthi kuvele amahlebezi okuthi uMbokazi uyohlolwa ngelinye lamaqembu ase-Europe.
IChicago Fire kubikwa ukuthi izimisele ngampela ngaye futhi seyinunusele iPirates ngemali elinganiselwa ku-R52 million ukuze iyidayisele lo mdlali.
UMbekezeli Mbokazi uhlabe umxhwele ngebhola elisezingeni alidlalayo kusukela enyuselwe eqenjini elikhulu kwiPirates ngoMashi ngaphansi kukaJose Riveiro.
Uqokwe njengephini likakaputeni weqembu ngaphambi kokuqala kwale sizini kanti nguye ohola iqembu enkundleni um uNkosinathi Sibisi engekho.
Ukukhula kwakhe ngokushesha kumenze wabonwa nanguHugo Broos ongazange elokhu eya le nale, wamfaka eqenjini lakhe kwiBafana Bafana.
UMbekezeli Mbokazi usize iBafana yakwazi ukungena eNdebeni yoMhlaba ka-2026, nakuba ukumiswa kwakhe kwamphoqa ukuthi aphuthelwe wumdlalo wokugcina kweyokuhlunga bebhekene neRwanda.
Kulindeleke ukuthi abambe iqhaza elibalulekile kwiBafana uma seyidlala kwi-Africa Cup of Nations ka-2025 eMorocco ezoqala ngoDisemba 21.
Ngemuva kwe-Afcon, iBafana izobe seyigxila ekulungiseleleni iNdebe yoMhlaba ka-2026 ezosingathwa ngokubambisana yi-USA, Canada, neMexico.
Uma uMbokazi ephumelela kwiChicago Fire, kuzoshaya isikhathi seNdebe yoMhlaba yena ebe esevele esezinze e-United States.
FUNDA NALA | IChiefs nePirates bazohlutha iStellies
IChicago Fire iqeqeshwa nguGregg Berhalter, ohole i-USA wayifaka esigabeni somkhumulajezi eNdebeni yoMhlaba ka-2022.
ZITHOLE ZISHISA: Cofa lapha usithole kwiWhatsApp Channel yethu
