IKaizer Chiefs isikhiphe abadlali abahlanu

Iqembu leBetway Premiership, i-Kaizer Chiefs seliqinisekise ukuthi abadlali abahlanu bazoyodlala kwamanye amaqembu ngokubolekiswa kule sizini.

Abadlali ababili beqembu elikhulu, owasesiswini uSamkelo Zwane nonozinti uBontle Molefe, bazodlala kwiHope FC eseKapa.

Laba bobabili babolekiswe kuleli qembu leMotsepe Foundation Championship kule sizini ukuze bathole isikhathi esanele sokudlala.

Sekungokwesibili uZwane ebolekiswa amasizini elandelana. Ngesizini edlule ubebolekiswe kwiSiwelele FC.

Nokho wehlulekile wukuzitholela indawo eqenjini eliqala imidlalo kuleli qembu likaLehlohonolo Seema elizinze eBloemfontein. 

I-Kaizer Chiefs iphinde yaveza ukuthi ibolekise ngabadlali abathathu abavela enkulisa yayo esizakhele igama ngokukhipha abadlali abahle.

Njengamanje kukhona oMfundo Vilakazi noMduduzi Shabalala eqenjini elikhulu abasuka kuyo le nkulisa muva nje.

Manje o-Ofentse Kgosana noVicky Mkhawana bazodlala kwiReal Natives ezinze KwaMhlanga, eMpumalanga.

Leli qembu belaziwa ngeCasric Stars phambilini kanti selishintshe igama kule sizini.

• FUNDA NALA | I-PSL nemininingwane yemidlalo yeMTN8

USfiso Simba yena uzoqhubeka nokudlala eGauteng njengoba ejoyine iGomora FC ngesikweletu.

Lesi sinyathelo sihlose ukunikeza laba badlali ithuba lokuthola amava abalulekile nokudlala njalo ukuze bathuthuke emsebenzini wabo.

• EZISHISAYO| Cofa lapha usithole kuWhatsApp