I-Arrows ibhuqe iSwallows yethula umdlali wayo omusha

– Intatheli yeLisenethini

IGolden Arrows ilume yaphephetha kwiMoroka Swallows ngoMsombuluko ngesikhathi imemezela umdlali wayo omusha, uLwande Mbanjwa. 

Izincokolela, i-Arrows imemezele ukuthi uMbanjwa “ubeyinyoni entantayo” ikhuluma ngesikhathi sakhe kwiSwallows esishabalele. 

Lokhu kubonakale kuchaza ukuthi njengoba esekwi-Arrows, usezoguqulwa abe “umcibisholo obukhali” ozosiza iqembu, hhayi ukudwanguza emoyeni. 

Kusukela ekubeni yinyoni entantayo kuya ekubeni wumcibisholo obukhali, siyamamukela uLwande Mbanjwa emndenini wakwaSthende,” kubhala i-Arrows esimemezelweni sayo. 

“Futhi lesi simemezelo siza ngosuku oluhle, usuku lwakhe lokuzalwa, ngakho-ke hlanganyela nathi njengoba simfisela usuku oluhle lokuzalwa.”

ULwande Mbanjwa, ongumdlali wasesiswini, ukhombise ukuba ngumdlali onekusasa elihle emidlalweni yakhe edlule kwiSwallows. 

Yize iMoroka Swallows ibidonsa kanzima kodwa ukwazile ukugqama ngokudlala kahle kuleli qembu laseSoweto. 

Kule sizini edlule, uMbanjwa udlale imidlalo engu-22 futhi wabamba iqhaza elikhulu ngokusiza ozakwabo ngokubakhela amagoli amahlandla amane. 

Kukholakala ukuthi ukusayina kukaMbanjwa kube ngenxa yezincomo zikaSteve Komphela ngaphambi kokuthi ashiye iGolden Arrows abuyele kwiMamelodi Sundowns. 

UKomphela, owaziwa ngokuba neso lekhono, ubone ikhono kuMbanjwa ngesikhathi esakwiSwallows ngomzuliwano wokuqala wesizini edlule.

Njengoba uMbanjwa ejoyina iGolden Arrows, abalandeli neqembu banethemba lokuthi uzoletha ikhono lakhe nokuzimisela eqenjini.

OLUNYE UDABA: Okwenza uZungu waMaZulu angabi nandaba neVAR

Bazothemba ukuthi uzoshintsha ekubeni “yinyoni entantayo” abe umdlali omqoka ozosiza i-Arrows ifeze izinhloso zayo ngesizini ezayo.