Ibhodla umlilo iPirates ‘ngamanga’ ngabadlali bayo
I-Orlando Pirates isiphendule ngamahlebezi ngabadlali bayo okuthiwa bafunwa phesheya.
Muva nje abanye babadlali bayo bebemataniswa namaqembu aphesheya okuthiwa asha amashushu ngabo.
Okukhulunywe ngaye kakhulu nguMonnapule Saleng, kanti amahlebezi ngaye aqutshulwe wukungabi bikho kwakhe eqenjini muva nje.
NgoLwesithathu, iPirates ikhiphe isitatimende icacisa ngalamahlebezi.
“Siphawule umkhuba okhulayo wokuqamba amanga ezinkundleni zokuxhumana,” sifundeka kanje isitatimende.
“Kunamahlebezi ngezicelo ezivela emaqenjini athile afuna abanye babadlali bethu.
“Ngokujwayelekile, ikilabhu iwashaya indiva amahlebezi angena sisekelo enzelwe ukunyusa izibalo zabafundi.
“Nokho, manje kufanele sibhekane nalama hlebezi angamanga.
“Amahemuhemu aqale ngendaba kaMonnapule Saleng. Athi ikilabhu ivimbe ukudayiselwa kwakhe eMiddle East.
“Saqale sayishaya indiva le ndaba engamanga, kodwa igcine seyikhula seyanda nezwe lonke.
“Igcine seyishicilelwa nakumasebe ezindaba amakhulu.”
IPirates iwuchithile umbiko wokuthi imeneja ihlangane nesikhulu seqembu ukudingida ukudayiswa kukaSaleng.
“Iqembu alizikhulumi izindaba zalo ezinxanxatheleni zezitolo,” kwengeza isitatimende.
“Asikho isikhulu esikhulume noRui Frois ngalolu daba.”
IPirates iphinde yachitha izinsolo ngoPatrick Maswanganyi.
Bekunamahlebezi okuthi uhujwa yiqembu lasePortugal ake wadlala kulo phambilini.
“Nakulokhu, yinhlebo nje,” kuqhuba isitatimende. “Ayikho into enjalo.”
IPirates izigxekile lezi zindaba ezingamanga, yathi ziphazamisa iqembu.
“Akwamukelekile lokhu. Sinxusa abezindaba ukuthi baqinisekise ulwazi ngaphambi kokulushicilela.
“Ukubika okungamanga akulimazi abadlali nekilabhu nje kuphela, kodwa kwehlisa nokwethembeka kwabezindaba.
“Sibonga abalandeli bethu futhi sibanxuse ukuthi bathembele ezinkundleni ezisemthethweni zekilabhu ngolwazi olumayelana neqembu.”
Kuzokhumbuleka ukuthi iLisenethini ike yalubhala udaba lapho beyiveza ubungozi bokuthula kwePirates ngalamahlebezi.
