Ezintsha ngoDladla kwiDurban City – ukhonjwa komakhelwane

I-Durban City FC isikuqinisekisile ukuhamba komqeqeshi uPitso Dladla, okuqede amahlebezi abesekhona isikhathi eside ngekusasa lakhe.

Lo mqeqeshi ushiya iqembu ngemuva kokudlala indima enkulu ekuqopheni umlando wakamuva kweDurban City.

Manje sekuvela ukuthi ushiya nje yingoba usethole amadlelo aluhlaza kwiGolden Arrows.

U-Pitso Dladla ubesehlale isikhathi eside kwi-Durban City afika kuyo eyiphini lomqeqeshi ngaphambi kokunikezwa ithuba lokuhola iqembu ekuqaleni kwalo nyaka.

NgoFebhuwari, waqokwa njengomqeqeshi wesikhashana ngemuva kokuxoshwa kukaSinethemba Badela.

UDladla uhole iCitizens inqoba iNedbank Cup ngemuva kokushaya iTS Galaxy kowamanqamu. 

Uphinde waba yingxenye ebalulekile ekusizeni iqembu ukuthi liqede endaweni ehloniphekile kwiBetway Premiership.

Esitatimendeni sayo, iDurban City ibonge umsebenzi omkhulu owenziwe yilo mqeqeshi.

“I-Durban City FC ingaqinisekisa ukuthi umqeqeshi u-Pitso Dladla usehambe eqenjini,” kusho isitatimende seqembu.

“UDladla ushiya iqembu ngemuva kwesikhathi esibalulekile lapho abambe iqhaza ekukhushuleleni iqembu kwiBetway Premiership njengengxenye yethimba labaqeqeshi, waphinde wahola iqembu ekunqobeni iNedbank Cup njengomqeqeshi wesikhashana.

“IDurban City FC ibonga uPitso Dladla ngeqhaza lakhe eqenjini futhi imfisela impumelelo kukho konke azobhekana nakho esikhathini esizayo.”

• FUNDA NALA | IChiefs ibuyisa uSheppard eqenjini elikhulu

Kubikwa ukuthi uDladla usezothatha umsebenzi wokuba ngumqeqeshi kwiGolden Arrows, lapho ezovala khona isikhala esishiywe nguManqoba Mngqithi.

• EZISHISAYO| Cofa lapha usithole kuWhatsApp