Amazwi okuqala kaMcCarthy oshiye iChiefs efika kwelaphesheya
U-Aiden McCarthy useqale isahluko esisha emsebenzini wakhe webhola ngemuva kokuhlukana ne-Kaizer Chiefs, wasayina neqembu lase-Azerbaijan, iSabah FC.
Lo mdlali oneminyaka engu-22 ubudala usemenyezelwe ngokusemthethweni yiSabah FC.
Ephawula okokuqala ngemuva kokwethulwa kwakhe, ubhekise umlayezo kozakwabo abasha, ushaye ngamafuphi: “Masisebenzeni.”
ISabah iqinisekise ukuthi u-Aden McCarthy usayine inkontileka yeminyaka emithathu, ehambisana nenketho yokwelulwa ngomunye unyaka.
Ngesikhathi esifanayo, i-Kaizer Chiefs nayo ikuqinisekisile ukuhamba kwalo mdlali.
Iveze ukuthi iyaziqhenya ngokumbona ethola ithuba lokuzibonakalisa ezingeni eliphezulu lase-Europe.
“Singakuqinisekisa ukuthi sivumelene ngokudedela u-Aden ngemuva kokuba sicelwe yiSabah FK.
“Siyaziqhenya ngokuthi uzodlala emidlalweni yokuhlungela i-Uefa Champions League ngesizini ezayo,” kusho uKaizer Motaung Junior.
U-Aden McCarthy ubengomunye wabadlali abathembekile kwi-Kaizer Chiefs ngesizini edlule.
Udlale imidlalo engu-31 kuyo yonke imiqhudelwano, washaya amagoli amabili.
Ubedlala njengomdlali wasemuva kwesobunxele aphinde adlale namaphakathi nendawo emuva.
Okumenza lo mdlalo uthokozise kakhulu ukuthi iSabah FC isanda kunqoba isicoco se-Azerbaijan Premier League.
Lokhu kusho ukuthi izodlala emizuliswaneni yokuhlungela i-UEFA Champions League ka-2026/27.
Kuphinde kunike uMcCarthy ithuba elikhulu lokuzibonakalisa emqhudelwaneni omkhulu kunayo yonke emhlabeni wamaqembu ase-Europe.
