Okwenza uNabi angasijiki isitayela yize imiphumela iphika
Umqeqeshi weKaizer Chiefs, uNasreddine Nabi, usazibophezele endleleni adlala ngayo yize ibukeka izothatha kude ukuletha imiphumela emihle.
Ekhuluma ngemuva kokuthi iChiefs ihlulwe ngo 1-0 yiCape Town City ngeSonto, uNabi uhlonze asakubonile kulezi zinyanga eziyisithupha zokuqala.
Lo mqeqeshi ukugcizelele ukuthi iqembu elikhulu njengeChiefs kumele lidlale ibhola elihehayo.
Kodwa ngabe yiyona ndlela yale kilabhu enkulu leyo?
Wengeze ngokuthi nakuba ebengasebenzisa enye indlela yokudlala ukuthola imiphumela ngokushesha, usazogxila kwifilosofi yeChiefs.
“Sekuphele izinyanga eziyisithupha, futhi sinomuzwa wokuthi mayelana nemodeli yethu yomdlalo, iqembu selishintshile, ikakhulukazi endleleni elidlala ngayo.
“Kuyiqiniso ukuthi ukungatholi imiphumela akusizi,” kusho uNabi.
“Kodwa ukube bengisabela umsebenzi wami noma bengijahe imiphumela, bengingadlala ngendlela yokudlala egxile ekuvaleni emuva…
“Ngingabheka ukuhlasela ngokuzuma ngisebenzisa u-Ashley Du Preez, oshesha kakhulu, futhi ngithole imiphumela ngaleyo ndlela.
“Kodwa ngabe yiyona ndlela yale kilabhu enkulu leyo? Cha, sifuna le kilabhu enkulu idlale ibhola elikhangayo.
“Ibhola elihehayo lihambisana nobungozi obuningi, kodwa kufanele sakhele kulokho.
“Futhi kufanele sikholelwe kukho, futhi sizoqhubeka sithuthuke nsuku zonke.”
Ukuphawula kukaNabi kuza ngesikhathi enengcindezi ekhulayo njengoba iChiefs kubhekwe ayivuse.
IChiefs – ehlanganise iminyaka engu-55 yasungulwa – inomunye umdlalo onzima njengoba izokwamukela iStellenbosch FC eFNB Stadium ngoLwesithathu kusihlwa.
