Amaqembu aseNingizimu Afrika aseqhathiwe kweyeCaf
IMamelodi Sundowns ne-Orlando Pirates sebetholile ukuthi yimaphi amaqembu abazovula ngawo kwiCaf Champions League.
ISundowns, engompetha beBetway Premiership, futhi ephume isibili kulo mqhudelwano ngesizini edlule, ngeke iwudlale umzuliswano wokuqala.
AMasandawana azobhekana nowinile phakathi kweRemo Stars yaseNigeria ne-US Zilimadjou yaseComoros esigabeni sesibili somzuliswano wokuhlunga.
IPirates, efinyelele kowandulela owamanqamu ngesizini edlule kulo mqhudelwano ngaphambi kokuhlulwa yiPyramids egcine ingompetha, yona izoqala emzuliswaneni wokuqala.
AmaBhakabhaka azohlangana neLioli FC yaseLesotho – iqembu okubhekwe izidlulele kalula kulo kwazise nemidlalo yasekhaya lizoyidlelela kuleli.
Uma edlule kwiLioli, iPirates izobe seyibhekena nozonqoba phakthi kweqembu eliphuma e-DR Congo neziqhwaga zaseSudan u-El Merreikh emzuliswaneni wesibili.
Zobili iziqhwaga ze-PSL zibalwa namaqembu ayizintandokazi ekutheni aye kude kulo mqhudelwano wezwekazi ngemuva kokwenza kahle ngesizini edlule.
KwiCaf Confederation Cup, iKaizer Chiefs – ebuyela emiqhudelwaneni yezwe okokuqala ngemuva kweminyaka emine – izoqala umkhankaso wayo ekuhambeni.
Lezi ziqhwaga zaseSoweto zizoya eLuanda, e-Angola, ukuyobhekana neKabuscorp Sport Clube do Palanca.
FUNDA NALA | USALENG UYAQALA, USUTHU NEZINGUQUKO EZIMBILI
Amakhosi abhekwe ukuthi enze kahle kulo mqhudelwano, ukubuyisa isithunzi sawo ebholeni lezekazi.
ICaf ikuqinisekisile ukuthi imidlalo yesigaba sokuqala somzuliswano wokuhlunga izodlalwa phakathi kuka-19–21 no-26–28 kuSepthemba.
Imidlalo yesigaba sesibili somzuliswano wokuhlunga yona iyobe seyiqala kusukela ku-17–19 no-24–26 ku-Okthoba.
