Zimbalwa izikhala, bayanda abaqeqeshi abazibhekile

• Sibongiseni GUMBI

Okungenani bane abaqeqeshi asebemnkantshubomvu abasembangweni wemisebenzi emibili ekhona yokuqeqesha iBetway Premiership njengamanje.

UManqoba Mngqithi, uDan Malesela, u-Eric Tinkler, noClinton Larsen bonke abanawo amakilabhu ngemuva kokushiya abebesebenza kuwo muva nje.

UMngqithi uhlukane neMamelodi Sundowns kulandela ukuqala kabi ngemuva kokuphuma kukaRulani Mokwena. 

Ikusasa likaMalesela kwiMarumo Gallants lisalokhu lingaqinisekile, nakuba izimpawu zikhomba ukuthi sekuseduze akhonjwe indlela. 

ULarsen ushiye iMagesi FC kungalindelekile, ememezela ukuhamba kwakhe kumabonakude bukhoma ezinsukwini ezimbalwa ngemuva kokuwina iCarling Knockout Cup. 

Khonamanjalo, uTinkler ukhishwe ngokusemthethweni yiCape Town City ngoLwesibili.

UKwanele Kopo uphinde wajoyina iqoqo labaqeqeshi abangasebenzi ngemuva kokushiya iChippa United, naye ngawo uLwesibili. 

Naphezu kokuba namava angatheni esigabeni esiphezulu, uKopo usengomunye wabaqeqeshi okungabhekwa kubo. 

Abanye abaqeqeshi abanolwazi lwePremiership, abafana noCavin Johnson, uShaun Bartlett, noDylan Kerr, nabo balinde amathuba abo alandelayo.

Njengamanje, mabili kuphela amakilabhu angenabo abaqeqeshi abakhulu abaqokwe ngokusemthethweni. 

IRichards Bay FC neGolden Arrows bathembele kubaqeqeshi besikhashana. IGallants nayo isebenzisa uhlaka lwesikhashana.

IMagesi FC isanda kuvala isikhala sayo, yaqoka u-Owen Da Gama ukuthi ahole iqembu lisuke ezembeni.

• OLUNYE UDABA: UShabalala uveza ‘isithako’ esifike noNabi kuye

Umjaho wemisebenzi yokuqeqesha ezingeni eliphezulu uyakhula njengoba amakilabhu ezozihlola kabusha ngaphambi kwengxenye yesibili yesizini.