‘Uze nenye’ u-Ouaddou ebophela elizobhekana neLupopo
Ulisethe ngendlela exakile u-Abdeslam Ouaddou iqembu lakhe le-Orlando Pirates elizogadulisana neSt Eloi Lupopo yaseDR Congo.
IPirates iya kulo mdlalo wecaf Champions League ilandela ngemuva ngo 3-0 eshaywe ngawo ekuhambeni ngempelasonto edlule.
Kudingeka inqobe ngo 4-0 kuya phezulu ukuze ikwazi ukudlulela esigabeni samaqoqo.
Omunye umphumela ongaba ngcono wukuthi inqobe ngo 3-0, bese kuyokhahlelwa amaphenathi izame ukunqoba khona.
Njengoba lo mdlalo umqoka kanje futhi kufuneka inqwaba yamagoli kuwo, u-Ouaddou uwuqala ngaphandle kwabagadli.
Phambili ubiphele abadali abathathu okungoTshepang Moremi, Patrick Maswanganyi no-Oswin Appollis okunguyena okubukeka ezoba ngumgadli kulo mdlalo.
UTshegofatso Mabasa noYanela Mbuthuma bona baqale ebhentshini kanti kungenzeka bafakwe uma izitobha zeLupopo sezikhathele kade zigijinyiswa u-Appollis noMoremi.
Ngokokuqala lo mqeqeshi elisethe ngale ndlela iqembu lakhe kusukela efikile kwiPirates, kodwa ke usevele uyethenjwa ngokuqhamuka namacebo uma kunzima.
Lo mdlalo use-Orlando Stadium kanti inkundla izogcwala phama njengoba amathikithi awo edayiswe wonke aphela.
- Ibophele kanje iPirates: Chaine – Sebelebele, Hotto, Seema, Mbokazi – Mbule, Nemtajela, Nduli – Maswanganyi, Moremi, Appollis.
- Ebhentshini: Buthelezi, Sibisi, Ndaba, Lebitso, Mariko, Dlamini, Dansin, Mbuthuma, Mabasa
