Ikhafula umlilo inyunyana ngoKhanye ‘othuka abadlali’
Inyunyana yabadlali bebhola bakuleli, iSouth African Football Players Union (Safpu) ikhafula umilo, futhi ifuna ukumudla luhlaa owayeyisihlabani seKaizer Chiefs osephenduke umhlaziyi, uJunior Khanye.
ISafpu ithi ukuhlaselwa ngamazwi okwenziwa uJunior Khanye kubadlali akusekhona ukuhlaziywa ibhola. Ikubiza ngokuthi “kuwukuthunaza isithunzi sabadlali.”
Amagama abadlali abafana noJayden Adams noThulani “Tyson” Hlatshwayo yiwo asanda kuthunazwa uKhanye. ISafpu ithi isikhathele nguye.
“Kwanele,” le nyunyana isho kanje esitatimendeni esishubile esikhiphe ngoMgqibelo. “Lokhu akukhona ukuhlaziya. Kuwukukhuluma komuntu onenzondo. Kunomona. Kunobuthi.”
UJunior Khanye uzakhele udumo ngokugxeka ngokukhululeka abadlali, abaqeqeshi namaqembu kwi-iDiski TV la engumhlaziyi khona.
Kodwa iSafpu ithi sekwanele, futhi izomthathela izinyathelo zomthetho uma engaphezi.
Imsola ngokudala isiko lokugconwa nokuthunazwa kwesithunzi nokugqilaza ngokomqondo abadlali.
Inyunyana ayizange ingundaze: Ifuna uJunior Khanye akhiphe isixoliso emphakathini.
Inxenxe yabezindaba ukuthi bapheze ukumnika ithuba sokukhuluma ukuze akhulume amazwi asuke ehlose ngawo ukuzitholela udumo.
WINA | Ithuba lokuwina neVicks neLisenethini
Ithi ikulungele ukuthatha izinyathelo zomthetho ngokushesha uma ukuhlukunyezwa kuqhubeka.
“ISafpu imile futhi ngeke ihlehle kulokhu,” kusho unobhala-jikelele uNhlanhla Shabalala.
“Inkathi yokuhlukunyezwa kwabadlali esidlangalaleni sesiphelile. Uma eqhubeka, sizophendula ngokummangalela…”
Ibamba likamongameli uTebogo Monyai nalo alizange ligwegwese: “Siyalinqaba isiko lokudicilelwa phansi kwabadlali okufihlwe ngokuthi kuwukuhlaziya ibhola. Sekwanele.”
UJunior Khanye usenesikhathi eside ephikisa abamsolazyo ngokuthi yena usuke “ekhuluma iqiniso.”
FUNDA NALA | UKwinika ucacisa eyengxabano ka-Ox neVikelambuso
ISafpu ayikavumi lokho. Ithi uthunaza abanye abadlali ukuze afihle ukwehluleka nezimpambuko zakhe.
Kubadlali abazithola belulazwa wuKhanye, umlayezo ovela ku-Safpu ucacile: “Awuwedwa. Uvikelekile. Sizolivikela igama lakho, ukubaluleka kwakho, nekusasa lakho.”
