Usejima kwelase-Argentina ‘ohambe isinyelela’ kwiDowns

• Intatheli yeLISENETHINI

UMatias Esquivel useqalile ukuzilolonga neClub Atlético Talleres ngemuva kokubolekiswa kuyo yiMamelodi Sundowns. 

Lo mdlali wasesiswini wase-Argentina ujoyine iSundowns kulindelwe lukhulu kuyena, enconywa “njengoyivelakancane” ngumqeqeshi wakudala uRulani Mokoena.

ISundowns kubikwa ukuthi yakhokha imali ecela ku-R50 million ngalo mgadli ngesikhathi ejoyina noThembinkosi Lorch ngoJanuwari.

Ukushiya kuka-Esquivel obolekiswe kwiTalleres kumangaze abaningi ikakhulukazi njengoba ehlale isikhathi esingaphansi kwezinyanga eziyisithupha kwiSundowns. 

Ngesikhathi sakhe esifushane neqembu, wakhombisa ukuba ngumdlali othembisayo, wadlala imidlalo engu-10, wakhela ozakwabo amagoli kabili. 

Phezu kwalezi zibalo, u-Esquivel uthwale kanzima ukuthola indawo eqenjini eliqala imidlalo.

Isinqumo sokumbuyisela kwiTalleres siqhakambisa ukuthi iqembu liyakubona angakwenza kodwa usadinga ukucijeka kakhudlwana. 

Kwi-Talleres, okuyiqembu allijwayele, u-Esquivel uzothola ithuba lokubuyisela ifomu nokuzethemba.

Ukubuyela kwakhe e-Argentina kubonwa njengethuba lokuvuselela ibhola lakhe, ngethemba lokuthi uzobuya eselungele ukuba nomthelela omkhulu. 

ISundowns ibingakasenzi isimemezelo mayelana nemibandela yokubolekiswa kwakhe osekwenze kwaba namahlebezi. 

OLUNYE UDABA: Uthethise intatheli oweBay ngesikweletu soMsinga United

Abanye baphakamise ukuthi uphindiselwe emuva buthule ngoba kubonakalo ungekho umehluko angawenzela iqembu likaManqoba Mngqithi.