USantos uweze iSundowns inqoba ingxenye yomhlaba

IMamelodi Sundowns isiqophe umlando ngokuba ngompetha beFIFA African-Asian-Pacific Cup ngemuva kokuhlula i-Al Ahli yaseSaudi Arabia ngo-2-1 eLoftus Stadium ngoMgqibelo.

Iqembu likaMiguel Cardoso selithathe elinye igxathu libheke emklomelweni omkhulu, okuyiFIFA Intercontinental Cup.

ISundowns iqale kahle kulo mdlalo, uNuno Santos wayibeka phambili ngegoli alingqofele enethini ngomzuzu ka-17.

I-Al Ahli nokho izibuyise zishisa izinduku ilinganisa ngegoli likaFiras Al-Buraikan alishaye emizuzwini emibili iSundowns ihambe phambili.

Esiwombeni sesibili, umdlalo uvuleke kakhulu njengoba zombili izinhlangothi bezifuna igoli lokunqoba.

I-Al Ahli imoshe amathuba amaningana, yagcina ikukhokhele lokho ngomzuzu ka-79.

UThabang Matuludi ugobe ibhola langena ebhokisini, lahlangana noSantos, obe eselingqofa ngobuchule laye layogaxela enethini ka-Edward Mendy.

Lokhu kunqoba kunike iMamelodi Sundowns indawo kwiFIFA Challenger Cup.

Lapho izobhekana nowinile phakathi kompetha beConcacaf, iToluca, nozonqoba kwiCopa Libertadores.

• FUNDA NALA | Okwenza iJohnson angayibali iChiefs kwalela isicoco seligi

Uma iMamelodi Sundowns ingawunqoba lowo mdlalo, izodlulela kowamanqamu weFIFA Intercontinental Cup, lapho izobhekana khona nompetha base-Europe, iParis Saint-Germain.

• EZISHISAYO| Cofa lapha usithole kuWhatsApp