URasebotja uphawula ngokujoyina iPirates kungazelele muntu
– Intatheli yeLisenethini
Ukusayiniswa kukaSelealo Rasebotja obekungalindelekile yi-Orlando Pirates kubangele ukuthi abalandeli bazame ukuqoqa ulwazi ngalo mdlali osemncane.
Ngenxa yokuthi ubengadlali njalo kwiSuperSport United futhi ephelelwa yinkontileka, kumangazile ukuthi iPirates isheshe ngale ndlela eyenze ngayo ukumsayina.
Lo mdlali oneminyaka engu-23 kumanje ungomunye wabadlali abasha ekhempini yePirates yokulungiselela isizini e-Spain.
Engxoxweni abe nayo ne-Orlandopiratesfc.com, uRasebotja uveze injabulo yakhe ngokujoyina lezi zinkunzi zaseSoweto.
“Ngajabula kakhulu ngesikhathi ngithola ukuthi iPirates iyangifuna,” usho kanje.
“Kuyiphupho lawo wonke umdlali webhola wukudlalela iqembu elikhulu.
“Ukuthi isikhungo esifana ne-Orlando Pirates sibuze ngomsebenzi wami kuyinto enkulu…
“Ngakho-ke, ngijabule kakhulu ukujoyina iqembu elikhulu njenge-Orlando Pirates.”
Ukuzijwayeza endaweni entsha kungaba inselelo, kodwa uRasebotja uthole usesheseh wajwayela kwiBucs.
“Kuba ngcono usuku nosuku. Kusukela osukwini lokuqala, ozakwethu bangamukele kahle.
“Njengoba isikhathi siqhubeka, ngizobajwayela futhi sizodlala kahle enkundleni.
“Kungumsebenzi oqhubekayo. Sizothatha usuku olulodwa ngesikhathi. “
Abalandeli beBucs bathole amazwibela abo okuqala ngoRasebotja ngesikhathi edlala imizuzu engu-45 neqembu elidlala kwi-English Championship, iPlymouth Argyle, ngoLwesihlanu.
URasebotja, ozwakalise ukuziqhenya okukhulu ngokufaka imibala yePirates okokuqala.
“Bengikuthokozele ukumela iqembu okokuqala. Kungumthwalo omkhulu, kodwa ngiwuthathe kahle.
“Kungaba ngcono ukusuka lapha. Ngikujabulele futhi ngazizwa ngiziqhenya ngokuthola ithuba lokumela iPirates.”
Kuleli sonto, amaBhakabhaka azobhekana namaqembu aseSpain iSevilla neGranada.
URasebotja ugcizelele ukubaluleka kokudlala namaqembu asezingeni ngesikhathi sokuliungiselela isizini.
“ISevilla ingelinye lamaqembu aphezulu eSpain, futhi singathanda ukudlala nabadlali abahamba phambili ukuze siveze esikwaziyo ukukwenza,” kusho yena.
“Ngikubheke ngabomvu ukuphuma ngiyoqhudelana neqembu elihle njengeSevilla…
OLUNYE UDABA: Iza nezinguqulo eyeKZN Premier’s Cup kulokhu
“Ngethemba ukuthi sizowuthola umphumela esiwufunayo nathi. Sizodlalela ukunqoba njengenjwayelo.”
