UPhala ahlanza iqiniso ngoSipho Mbule ‘ongasadlali’ kwiBucs
Ukungabonakali kukaSipho Mbule emidlalweni yakamuva ye-Orlando Pirates sekukhathaze ngisho uThuso Phala ‘ongafuni nokulibona’ leli qembu.
UPhala – owazakhela igama kwiKaizer Chiefs neMamelodi Sundowns – uphalaze iqiniso ngesimo salo mdlali esingamphethe kahle.
Yize ekucacisile ukuthi yena ungumlandeli wokuqina weChiefs, futhi akayifiseli okuhle iPirates, uThuso Phala uthi ubeseqala ukuyibuka ngenxa kaSipho Mbule.
“Angiyena umlandeli wePirates futhi ngifuna kube yiChiefs enqoba iligi,” kuvuma uPhala kwi-Omni Sports.
“Kodwa ngenxa yokuthi siyamthanda uMbule, singabalandeli bakhe… Ngisho abalandeli beChiefs bebeyibuka iPirates.
“Mhlawumbe angizikhulumele mina. Bengiyibuka ngoba ngiyathanda ukubuka uMbule edlala.
“Yingakho bengibuka imidlalo yePirates. Phambilini bengingayibuki iPirates – ngizoyibukelani vele?
“Kodwa manje bese kunesizathu sokuthi ngiyibuke iPirates (ngenxa kaMbule),” kuqhuba uPhala.
Ukhale ngokuthi njengoba lo mdlali othandwa ngabalandeli engasadlalswa nje, sekunzima kuye unubuka iPirates.
Uphinde waveza imibuzo ngokuthi kungani engadlaliswa wathi uma kuwukuthi uphunyuziwe, lokho kuyaxaka ngoba ilwela iligi.
“Manje abasamdlalisi. Lokho kusho ukuthi nathi asisenasizathu sokubuka iPirates uma idlala.
“Uma ubeka abadlali bakho abaphambili ebhentshini uthi uyabaphumuza. Ngapha ulwela iligi, uzobadlalisa nini? Sekusele imidlalo emibili?
“Mina angiqondi, mhlawumbe yisiko lePirates ukuphumuza abadlali – angazi.
“Iligi uyinqoba angazi… Kunezizathu ezihlukene. Mhlawumbe abantu bePirates bazosicacisela, mina angazi.”
FUNDA NALA | UMatlou uveza ubuhlungu abuzwiswa abalandeli beChiefs
UThuso Phala akayedwa kwabakhalela uSipho Mbule njengoba nabalandeli bayo iPirates bekhala ngaye.
Sekuze kunokukhathazeka ukuthi mhlawumbe kukhona okungalungile akwenzile osekumenze wakhishwa eqenjini.
