Owayegijima kwiChiefs akakayikhohlwa inqindi kaMabizela
- Intatheli yeLISENETHINI
Umgadli odlale emaqenjini ehlukene kwiPSL, okukhona kuwo neKaizer Chiefs, uthi namanje akakalukhohlwa usuku aphenduka isisulu senqindi kaMbulelo Mabizela.
UDavid Zulu, oke wadlala nakwiChippa United, uthi wazithola esephenduke isaka leli okujima ngalo amabhokisa.
Wayedlala kwiBlack Leopards kanti uMabizela wayedlala kwiMpumalanga Black Aces ngaleso sikhathi.
Uxoxe le ndaba yakhe engxoxweni nabeKickOff muva nje, kanti uthe babedlala umdlalo wobungani.
“I-Aces ngaleso sikhathi yayinoMabizela eqenjini layo,” kusho uZulu, oneminyaka engu-38.
“Angikaze ngithole izibhakela eziningi kanjeyana empilweni yami. Ngaphuma enkundleni umzimba ubuhlungu wonke.
“Ngazama ukukhuluma naye, ngimcenga ukuthi ayeke ukungigukluza. Kodwa wayevele aphendule ngokuthi, ‘hhayi wena mfana fu*%gi mani, suka la eduze kwami’.
“Lokho wayekusho ngezwi eliphansi. Ngabe sengiqhela eduze kwakhe. Kodwa ngabe sengizw anje ‘Guklu’.
“Uma ngiphenduka ngibheka, uMabizela futhi usela eduze kwami. Waphinda wangitshela ukuthi ‘ngikutshelile ukuthi suka la’.
“Ngamtshela ukuthi, ‘Awukahle ndoda, wumdlalo wokulungiselela isizini lona, yini wenza kanje?’ Ngezwa nje ‘guklu’ futhi.”
Uthi wazama ukutshela unompempe, kodwa akangasizakala ngoba wamtshela ukuthi yena ubheke okwenzeka la kunebhola khona.
Uthi waze wagcina esedlala ngasesiswini, esebalekile phambili la kumele adlale khona ngoba ebalekela uMabizela.
Uphinde waveza ukuthi omunye umdlali wasemuva owayemthwalisa kanzima ngokumsabisa uPaulos Masehe owayedlala kwiFree State Stars.
“Ibhola elikhokhelayo alilula. Uthola abadlali abafana noPaulos Masehe owayevele aphefumule la entanyeni kuwe bese ekuhlebela ukuthi, ‘ungabaleki, yiza la eduze kwami, ungabaleki’.”
