Ushintsho ngoweChiefs neminye kwiCarling Cup

• Intatheli yeLISENETHINI

Umdlalo weKaizer Chiefs neSuperSport United kwiCarling Knockout, obewuhlelelwe u-Okthoba 20, usuhlelwe kabusha. 

Kukhona neminye imidlalo emibili esishintshiwe. Lo mdlalo osvele ubhekwe ngabomvu waMatsatsantsa naMakhosi usuzoba sePeter Mokaba Stadium ePolokwane.

Ngeke usaba ngeSonto, kodwa uzoba ngoMgqibelo (ka-Okthoba 19) ebusuku. Bewukade uhlelelwe ukuba ngeSonto ntambama.

Lolu shintsho luvumela iSuperSport United isikhathi esengeziwe sokuzilungiselela umdlalo wayo weligi ne-Orlando Pirates ngoLwesibili  luka-Okthoba 22. 

Akuwona wodwa lo mdlalo ushintshiwe. Umdlalo weCape Town City neRoyal AM ozoba se-Athlone Stadium, ubuzoba semini, kodwa sewuzoba sebusuku. 

Inkundla nosuku akushintshile kuwo, kushintshe ukuthi usuzoqala ngo-8 ebusuku esikhundleni sika-3 ntambama ngoMgqibelo ka-Okthoba 19. 

NowePolokwane City neMarumo Gallants, obukade uzoba sebusuku, wona sewubuyele ku-3 ntambama ngawo uMgqibelo ka-Okthoba 19.

Lezi zinguquko ziqinisekiswe yiPSL ngoMgqibelo emini. Eminye imidlalo isamile lapho beyikhona. 

• OLUNYE UDABA: UZwane ubonge ozakwabo engena kwabakhethekile kwiBafana

Isiyonke le midlalo yomzuliswano wokuqala kwiCarling Knockout ime kanje: 

• Okthoba 18: AmaZulu v Stellenbosch FC, eKing Zwelithini Stadium ngo-7 ebusuku. 

• Okthoba 19: Pirates v Magesi FC, e-Orlando Stadium, 3pm; Polokwane City v Marumo Gallants, e-Old Peter Mokaba Stadium, 3pm; Sundowns v Arrows, eLucas Moripe Stadium, 6pm; CT City v Royal AM, e-Athlone Stadium, 8pm; SuperSport v Chiefs, ePeter Mokaba Stadium, 8pm. 

• Okthoba 20: TS Galaxy v Chippa, eMbombela Stadium, 3pm, Richards Bay v Sekhukhune, eKing Zwelithini Stadium, 5.30 pm.