UNtokozo Sikhakhane uxwayisa ababolekiswe yiKaizer Chiefs
Ngu-Alfred Ngubane
Ingwazi yeKaizer Chiefs uNtokozo “Koloba” Sikhakhane ukhiphe umlayezo oqinile kodwa okhuthazayo ewubhekise kuSamuel Zwane noHappy Mashiane.
Laba badlali bobabili okwamanje babolekiswe yiChiefs kwiSiwele FC, kanti uSikhakhane ubanxuse ukuthi balisebenzise ngokugcwele leli thuba labo uma befisa ukubuyela eNaturena.
“Ngicabanga ukuthi manje sekukumdlali ngamunye nokuthi usebenza kanzima kangakanani kwiSiwelele FC,” kusho uSikhakhane kwiLisenethini.
“Uma besebenza kanzima, bangalithola ithuba lokubuyela kwiKaizer Chiefs ngoba basenezinkontileka neqembu.”
Esebenzisa ulwazi lwakhe, uSikhakhane ukhumbule ngokubolekiswa kwakhe ngesikhathi esengumdlali.
“Ngabolekiswa yiKaizer Chiefs kwiDurban Stars ngayodlala kwiNational First Division isizini yonke.
“Ngemuva kwalokho, ngalandela umqeqeshi wami saya kwiDynamos FC,” kuqhuba uSikhakhane.
“Ngafika lapho ngenza khona umthelela omkhulu ngihambisana noSandile ‘AK’ Ndlovu, naye owayebolekiswe yiMamelodi Sundowns.
“Ngemuva kwaleyo sizini, amakilabhu ethu asibuyisa ngoba ebona ukuthi sesiqinile ngokwengqondo — futhi nokhakhayi seluqinile.
“Ngafika ngabanga indawo nezingwazi ezifana noJohn ‘Shoes’ Moshoeu ongasekho, uJabulani Mendu, noThabo ‘Tsikitsiki’ Mooki.”
FUNDA NALA | Izinkinga zomjolo koweCameroon
Weluleke uZwane noMashiane ukuthi bahlale bezinikele futhi baphathe ukubolekwa kwabo njengenhlolokhono yokubuya kweChiefs.
“Akumele bakhohlwe ukuthi iKaizer Chiefs ibathumele khona ukuthi bayodlala futhi bafunde ukuze bakhule.
“Uma wehluleka ukusebenza lapho ubolekiswe khona, uzohamba futhi ungaphinde ubuyele ekilabhini.”
Njengamanje, bobabili uZwane noMashiane basadonsa kanzima ukungena esikimini kwiSiwelele FC — isimo esigcizelela isexwayiso sikaSikhakhane.
ZITHOLE ZISHISA: Cofa lapha usithole kwiWhatsApp Channel yethu
