IPirates imthole kwiMilford ebishoda ngaye

I-Orlando Pirates isiqinisekise ukuthi isimtholile omunye umdlali wasemuva kwesokudla – imthole kwiMilford FC.

Lezi zinkunzi zaseSoweto seziqinisekise ukusayinwa kukaBulelani Sigomoshe njengoba leli qembu liqinisa indawo yasemuva kwesokudla ebishoda ngabadlali.

Umqeqeshi u-Abdeslam Ouaddou usanda kubalisa ngokushodelwa kule ndawo, ethi uKamogelo Sebelebele akalona irobhothi elingakwazi ukudlala yonke imidlalo.

USigomoshe, oneminyaka engu-26, ujoyine iBhakabhaka ngokushesha futhi kulindeleke ukuthi ajoyine ozakwabo abasa maduze.

I-Orlando Pirates imemezele lesi sivumelwano ngesitatimende, yathi “iyajabula ukumemezela ukusayinwa kukaBulelani Sigomoshe osuka kwiMilford Football Club.”

IBhakabhaka lithe lo mdlali wasemuva uzoletha “ukujula nokuncintisana okwengeziwe ezinkethweni zeqembu emuva.”

“Ukuthengwa kukaSigomoshe kuyingxenye yemizamo eqhubekayo yekilabhu yokuqinisa iqembu njengoba iBhakabhaka liqhubeka nokuphishekela izinhloso zalo kuyo yonke imiqhudelwano,” kusho isitatimende.

USigomoshe uzohlangana nethimba labaqeqeshi nabanye abadlali ngokushesha njengoba eqala lesi sahluko esisha emsebenzini wakhe.

IPirates iphinde yamamukela lo mdlali emndenini weBhakabhaka, yamfisela impumelelo kuleli qembu.

Ukufika kukaSigomoshe kunikeza u-Abdeslam Ouaddou enye inketho ebalulekile kule ndawo.

Uzoncintisana noSebelebele kule ndawo. USebelebele ubesele eyedwa kule ndawo ngemuva kokukhululwa kukaBandile Shandu, uThabiso Lebitso noDeano Van Rooyen.

• FUNDA NALA | UMaboe uphawula ngokubuyela kwiBafana

Ukusayinwa kukaSigomoshe kusho ukuthi i-Orlando Pirates manje isinokuncintisana okwengeziwe kule ndawo njengoba ilwela izindebe kuyo yonke imiqhudelwano.

• EZISHISAYO| Cofa lapha usithole kuWhatsApp