Unozinti ‘ulekelele’ iPirates ihubuluza iCity
- Sibongiseni GUMBI
Kube yiphutha likanozinti wePolokwane City elisize i-Orlando Pirates ishaye igoli lesibili, neliqinisekise ukuthi ayisekho indlela yokubuya kwizivakashi zayo zosuku.
Lo nozinti, uManuel Sapunga uvele wahlulwa wukufaka ibhola emxhakeni, labuyela kumdlali wePirates.
Lokhu bekulandela ukuthi uKarim Kimvuidi ededele udalimede weshodi engaphandle kwebhokisi.
Kodwa esikhundleni sokulifaka emxhakeni, uSapunga ulishaye ngesifuba labuyela enkundleni.
Libe selihlangana no-Evidence Makgopa obesanda kungena, walidla ngonyawo lwesinxele wasala edayiva sengathi ungumbhukudi uSapunga.
Lo nozinti uphende walekelela uMakgopa ashaye igoli lakhe lesibili, nelibe ngelesithathu lePirates.
Uhluleke wukukhahlela ibhola alisuse eduze kwakhe, walifica uMakgopa qede walidudulela enethini.
Nokho mhlawumbe kuleli kumele kusolwe nesitobha uRaymond Daniels obezame ukumphasela kodwa washaya ishodi lenkukhu.
IPirates beyihambe phambili ngegoli likaMonnapule Saleng ngomzuzu ka-55, nalo elibe nesigemegeme salo.
Ngemuva kokushaya leli goli, lo mdlali ube eseshayiseka ekhanda eshayisana noHelmi Gueldichi ongumlolongi wemizimba yabadlali kwiPirates.
Ukushayeka kwakhe ekhanda kuphoqe ukuthi asheshe akhishwe, kwangena uKimvuidi endaweni yakhe.
Lokhu kunqoba kubeke iPirates esicongweni seligi yeBetway Premiership njengoba isinamaphuzu ayisithupha.
Nokho ukuqhwakela kwayo kungaba okwesikhashana uma iMamelodi Sundowns inqoba emdlalweni wayo ongawo uLwesibili ntambama.
Umdlalo olandelayo wePirates useThekwini, eKing Zwelithini Stadium la iyobhekana khona neRichards Bay FC ngeSonto.
