IChiefs ‘ibhenefithile’ ishaya i-Arrows? UHlungwani uyacacisa
Owayengunompempe kwiPSL, Caf neFifa, uVictor Hlungwani usephawule ngesigameko esenzeke emdlalweni weKaizer Chiefs neGolden Arrows ngesonto elidlule.
Lesi sigameko saphetha ngegoli iKaizer Chiefs eyashaya ngalo i-Arrows emdlalweni weBetway Premiership.
Leli goli lashiya umqeqeshi waBafana Bes’thende uManqoba Mngqithi ecasuke eqhuma futhi ecela ukuba kusheshiswe indaba yeVAR kwiPSL.
Wakubeka kwacaca ukuthi u-Aden McCarthy wayesendaweni engamfanele (offside) ngesikhathi eshaya leli goli mbumbulu.
Manje uVictor Hlungwani useveze ukuthi nebala iKaizer Chiefs yabhenefitha ngesinqumo esingafanele esathathwa unompempe.
“Asiye kulo mdlalo weChiefs ne-Arrows. Ngomzuzu ka-39 kwaba negoli elashaywa ngu-Aden McCarthy,” kusho uHlungwani.
“Kwaba nebhola elibekwe phansi (free kick). Yathathwa ibhola lathunyelwa ebhokisini.
“Ngesikhathi uLilepo elithinta ibhola, uMcCarthy wayesevele esendaweni engamfanele.
“Kodwa ke ngokomthetho akukho phutha kulokho uma nje ungaphazamisi lutho,” kuqhuba uHlungwani.
“Uma usendaweni engakufanele kumele kulindwe kubonakale ukuthi uyalidlala yini ibhola noma uyaphazamisa ngandlela thize.”
Ucacise nokuthi abanye bathi njengoba ibhola lafika kuMcCarthy selibuya kunozinti we-Arrows kusho ukuthi wayengasekho endaweni engamfanele.
“Kuthe uma unozinti elivimba ibhola, lawela kuMcCarthy obesendaweni engamfanele,” kuqhuba uHlungwani.
“Uma udlala ibhola ulapho, kumele lingabalwa igoli. Kukhona ke nalabo abathi ngoba laselibuya kunozinti kusho ukuthi wayengasekho endaweni engamfanele.
“Labo kusamele beze sizobahlalisa phansi sibafundise umthetho webhola ngoba ayikho leyo.
“Uma uthinta ibhola kade usendaweni engakufanele noma ngabe selibuya epalini kusho ukuthi ususecaleni.”
FUNDA NALA | Izinkunzi zePSL embangweni wokusayisa isihlabani esifufusayo
Ukuvumile ukuthi nebala ukube bekuneVAR le eyayikhalelwa uMngqithi leli goli lalingeke libalwe nhlobo.
