Uncome ‘abaphathi’ oweDurban City iqopha umlando
Iqophe umlando i-Durban City ingena kowamanqamu wendebe kwesizini yayo yokuqala isesigabeni esiphezulu sebhola elikhokhelayo.
I-Durban City ishaye iCasric Stars ngo 1-0 emdlalweni owandulela owamanqamu kiNedbank Cup ngoMgqibelo.
Kub yigoli likaSiphamandla Mlilo elibe wumkhonto ogwaze ekhaya elisize ezikaPitso Dladla zingene kowamanqamu.
Ekhuluma ngemuva komdlalo, uDladla ubonge iqhinga labaphathi – ikakhulukazi usihlalo iFarook Kadodia.
“Ukuzilungiselelakwethu kulo mdlalo kube ngokuhlukile uma ngikhuluma iqiniso,” kusho uDladla.
“Usihlalo nebhodi elengamele ikilabhu benze okuhlukile. Basitshele ukuthi ukunqoba lo mdlalo akuncikile kuphela kumacebo esiya ngawo emdlalweni.
“Kodwa kuzoncika kakhulu ekubambisaneni kwabadlali. Babe sebehlela uhambo lokuyiqinisa ubudlelwano.
“Kule khempu ebesikuyo abadlali bebenezinto okumele bazenze nayedwana, ezidinga basebenzisane ngamaqoqwana nezinye ezidinga babe yiqembu eliphelele.
“Emdlalweni kuthe uma sesingaphansi kwengcindezi, ngawubona umthelela walokho.
“Ngize ngasho ngenhliziyo ukuthi kumele ngincome usihlalo uFarook Kadodia nebhodi ngalolu hlelo,” kuphetha uDladla.
I-Durban City manje seyilinde ozonqoba phakathi kweTS Galaxy neMilford FC ukuthola ezobhekana naye kowamanqamu.
Lamaqembu azogadulisana eSolomon Mahlangu Stadium ngeSonto ngo-3 ntambama.
