UNabi uveza okwenze abuyisele u-Ox esikimini
- Sibongiseni GUMBI
Umqeqeshi weKaizer Chiefs, uNasreddine Nabi, usechaze ngokuvuka kwakamuva kukaSibongiseni “Ox” Mthethwa, osebuyele esikimini.
UMthethwa uhlabe umxhwele emidlalweni emibili yokugcina yeChiefs yeBetway Premiership.
Lo mdlali oneminyaka engu-30 ubudala ubekade ethwale kanzima ukuthola ijezi kusukela kufike uNabi, nokuqubule amahlebezi okuthi angase akhululwe.
Nokho ukudlala kukaMthethwa kwiHome of Legends Cup eGqeberha kumenze wathola indawo eqenjini eliqala imidlalo.
Ubegqamile emidlalweni yeligi bebhekene neRichards Bay FC neRoyal AM, okwenze nabalandeli babuyelwa wuthando lwakhe.
UNabi uncome ukuzinikela kukaMthethwa ukuqala kabusha ukuze aqonde kangcono indima yakhe eqenjini.
Lo mdlali wasesiswini naye usebenze kanzima ukuzithuthukisa lapho ebebuthakathaka khona.
Lo mqeqeshi ukholwa ukuthi uMthethwa usekhulile, waba ngumdlali obalulekile eqenjini.
“Ngicabanga ukuthi kulokhu -Ox useyayiqonda indima yakhe. Sisebenze ndawonye kokuthile obekungekuhle ngaye,” kusho uNabi.
“U-Ox usebenze kanzima ukuzithuthukisa, elungisa obekungalungile kuye.
“Uma esebenza kanzima, uzothuthuka. Wathatha ithuba lakhe walisebenzela.
“Kuyafana nakubo bonke abanye abadlali. Ngihalalisela u-Ox ngokusebenza kwakhe.”
