Ukulimala kushwebise unozinti waMaZulu ithuba leNdebe yoMhlaba
Unozinti waMaZulu FC, uDarren Johnson akasekho embangweni wokungena kwiBafana Bafana ngaphambi kweNdebe yoMhlaba ngemuva kokulimala.
Lo nozinti oneminyaka engu-29 ubudala ubesengqongqoza eqenjini likaHugo Broos kulandela ukwenza kahle oSuthwini kule sizini.
Nokho amathemba akhe asephelile ngemuva kokulimala okuzomhlalisa izinyanga eziyisithupha engadlali.
Umqeqeshi waMaZulu u-Arthur Zwane nguye oqinisekise ukuthi lo nozinti ulimele futhi ngeke esadlala kule sizini.
“UDarren ngeshwa uzobe engekho isikhathi eside,” kusho uZwane. “Uzohlala okungenani cishe izinyanga eziyisithupha engadlali.”
UJohnson, ojoyine AmaZulu ekuqaleni kwale sizini, usheshe wazibonakalisa futhi waba ngunozinti oyisethenjwa waMaZulu.
Udlale imidlalo engu-21 kuyo yonke imiqhudelwano futhi akangangenelwa goli kweyisishiyagalolunye.
Ukungabibikho kwakhe sekuvule umnyango u-Olwethu Mzimela okunguye osevimba muva nje, kanti umakadebona uRichard Ofori yena uba sebhentshini.
UZwane uvumile ukuthi ukulimala konozinti kube yinselelo enkulu kuleli qembu lakhe kule sizini.
“Cishe yithina kuphela iqembu elisebenzise bonke onozinti balo kule sizini,” kuqhuba uMangethe.
“Uma kwenzeka noma yini ku-Olwethu, sino-Ofori, kodwa ke lapho sizobe singasenaye osebhentshini.
“Kuzofanele sithembele konozinti beDDC. Umbuzo uthi, ingabe sebelilungele yini ibhola elisezingeni eliphezulu?
“Lezi yizimo ezingalindelekile. Kodwa ngeke ukhononde ngazo — okufanele ukwenze ukuqhubeka futhi uthole izixazululo.”
Yize engenelwe amagoli amathathu emdlalweni wabo wakamuva ne-Orlando Pirates, uMzimela ube nomdlalo oqinile.
Uvombe amabhola amaningi abemabi, nabengenza umphumela ugcine ube yihlazo elibi kuMaZulu.
Ukulimala kukaJohnson waMaZulu kulimaze izinhlelo zeqembu nezakhe uqobo zokungena kwiBafana.
Njengoba uJohnson ephumile embangweni, kushiya uSipho Chaine wePirates, uBrandon Petersen weKaizer Chiefs noRicardo Goss weSiwelele FC.
Kubhekwe ukuthi uBroos akhethe kubala ozozinti ababili abazoncintisana noRonwen Williams kwiBafana.
