Ukudideka abeRoyal AM bebuyiselwa emakhaya

Sekuqubuke enye inkinga kwiRoyal AM, abadlali kuthiwa batshelwe ukuthi babuyele emakhaya futhi imidlalo yabo imisiwe. 

IRoyal AM bekumele idlale neChippa United ngoMgqibelo kodwa lowo mdlalo usuhlehlisiwe ngokusemthethweni.

IChippa yiyo ememezele izindaba zokuhlehliswa kwalo mdlalo esinkundleni zokuxhumana ngoMsombuluko ntambama.

Khonamanjalo, iLisenethini ithole ukuthi abadlali beRoyal AM batshelwe ngoMsombuluko ukuthi abayeke ukuzilolonga babuyele emakhaya.

Umthombo osondelene nomunye wabadlali uthe abatshelwanga ukuthi bazobuyela nini ejimini nokuthi kwenzenjani njengoba bemiswa ekuziqeqesheni. 

“Omunye wabadlali babo usanda kungitshela ukuthi bakhululiwe kwathiwa abagoduke,” kusho umthombo.

“Kodwa abazi ukuthi bazobuya nini futhi ngisanda kubona ukuthi umdlalo wabo neChippa usuhlehlisiwe. 

“Bathole zonke izinkokhelo zabo futhi bebebheke ngabomvu ukuqhubeka nomsebenzi wabo.”

Omunye umthombo uthe kungenzeka ukuthi iFifa iphoqe ukuthi ikilabhu ivalwe ukuze kutholakale izindleko zemali ekweletwa abadlali bakudala beqembu.

Njengamanje iRoyal AM ingaphansi kwesigwebo sokuvinjelwa ukusayina abadlali seFifa ngemuva kokutholakala ukuthi ixoshe ngokungafanele uSamir Nurkovic noRicardo Nascimento. 

“Ngisola ukuthi lolu daba luhlobene nesigwebo seFifa. Uyakhumbula ukuthi iFifa ibisabise ngokuyifaka endalini le kilabhu uma ihluleka ukukhokhela uNurkovic.” 

• OLUNYE UDABA: Uziphendlela isikhundla kwiChiefs ‘umngani’ ka-Inacio

Imizamo yokuthola iRoyal AM ukuthi iphawule ngale ndaba ayiphumelelanga.