UKhune usaba ukuzakhela igazi elibi kwabeChiefs
- Intatheli yeLISENETHINI
Akafuni ukuphula izinhliziyo zabalandeli beKaizer Chiefs u-Itumeleng Khune ngokuthi bambone esegijima kwelinye iqembu.
UKhune uphelelwe yinkontileka kwiChiefs ngoJuni kanti ayivuselelwanga okusho ukuthi usengajoyina noma yiliphi elinye iqembu.
IChiefs yakubeka kwacaca ukuthi ayisafuni ukuthi aqhubeke nokudlala lo nozinti, yamnxenxela izikhundla ophikweni lokumaketha.
Kodwa yena usazibona engadlala okungenani eminye iminyaka emithathu, aze afike eminyakeni engu-40 noma ngaphezulu.
Ekhuluma noThabiso Mosia kwiRadio 2000 muva nje, uKhune uveze ukuthi ngeke akwazi ukudlala kwelinye iqembu kuleli.
“Angiziboni ngigqoke ijezi lelinye iqembu lakuleli ngaphandle kweleKaizer Chiefs ngoba isenhliziyweni yami kusukela ngisemncane,” kusho uKhune.
“Yingakho ngicabanga ukubheka iqembu ngaphandle kwaseNingizimu Afrika, mhlawumbe kumaligi asenhla ne-Afrika.
“Namanje ngisagcizelela ukuthi ngizibona ngisengakwazi ukwenza ezibukwayo enkundleni ngoba ngiphethe isipiliyoni futhi umzimba usangivumela.”
Wenze isibonelo ngoGianluigi Buffon wase-Italy, ethi yize esengale kuka-40 ngeminyaka, kodwa namanje usayibambile – naye ufuna okufanayo.
“Uma ubheka inkakha kanozinti wase-Italy, uBuffon namanje usadlala yize esefike eminyakeni engaphezulu kuka-40,” kuqhuba uKhune.
“Lapha ekhaya uDenis Onyango weMamelodi Sundowns usadlala yize eneminyaka engu-39.
“Manje mina yini engivimba ukuthi ngiqhubeke ngidlale?” kwengenza uKhune, ohlale iminyaka engu-25 kwiChiefs.
Le nsizwa edabuka eVentersdorp, eNorth West, ifike kwiChiefs ineminyaka engu-12, yakhulela ezinkulisa zayo ngaphambi kokunyukela eqenjini elikhulu.
Ube ngunozinti ohamba phambili kwiChiefs neBafana Bafana iminyakanyaka kodwa wabonakala ehlelwa yifomu kule minyaka emine edlule.
