Isinqumo seSundowns ngoMaseko ongekho ezinhlelweni zayo

I-Mamelodi Sundowns kubikwa ukuthi ifuna uThapelo Maseko aqhubeke nomsebenzi wakhe phesheya kunokuba ajoyine elinye iqembu leBetway Premiership.

Lo mdlali wasesiswini uvele akekho ezinhlelweni zomqeqeshi uMiguel Cardoso njengoba engazange ahambe neqembu ukuyolungiselela isizini entsha e-Austria. 

Kusukela lapho, iSundowns imnike imvume yokubheka amathuba kwenye indawo, kungaba ngokubolekiswa noma ngokudayiswa ngokuphelele.

UMaseko ubuyile eChloorkop ngemuva kokuchitha ingxenye yesibili yesizini edlule ebolekiswe kwi-AEL Limassol yaseCyprus. 

Ngokubika kweSABC Sport, yize leli qembu belifisa ukumgcina, lokho akwenzekanga ngenxa yezinkinga zokungaholelwa kahle ezigcine sezidluliselwe kwiFifa.

Kubikwa ukuthi yena nabammele abafuni ukuphinde babhekane naleso simo. 

Yingakho i-Mamelodi Sundowns ivulele amaqembu aphesheya ukuthi engamsayina u-Thapelo Maseko, kodwa ayifuni ukuqinisa izimbangi zayo zaseNingizimu Afrika.

Igama likaMaseko liphinde lakhula ngesikhathi edlala kwiNdebe yoMhlaba neBafana Bafana. 

Washaya igoli eliwukuphela kwalo leBafana Bafana ngesikhathi inqoba iSouth Korea, yadlulela esigabeni seLast 32.

Lo mdlali kukholakala ukuthi ufuna ukushiya unomphela kulezi zinkunzi zasePitoli.

Kodwa lokho kuzoncika ekutheni iqembu elizomfuna lizimisele yini ukukhokha imali ezofunwa yiSundowns noma limthathe kuqala ngokubolekiswa okunombandela wokumthenga.

U-Thapelo Maseko wajoyina i-Mamelodi Sundowns ngo-2023, kodwa ukulimala kabi ngesikhathi se-Afcon kwaphazamisa ukukhula kwakhe. 

• FUNDA NALA | UDa Cruz uvike umbuzo ngabasha kwiChiefs

Manje kubonakala sengathi isahluko sakhe esilandelayo sizoba ngaphandle kwaseNingizimu Afrika.

• EZISHISAYO| Cofa lapha usithole kuWhatsApp