Ukhishwe ngelibomvu esebhentshini owoSuthu lushaya iChippa
- Sibongiseni GUMBI
AmaZulu FC anqobe okokuqala ngoLwesibili, eshaya iChippa United ngo 2-0 emdlalweni weBetway Premiership obe nezigemegeme ezimangazayo.
Enye yezinto ezithathe amehlo kube wukukhishwa komdlali woSuthu, u-Abubaker Mobara ngekhadi elibomvu esebhentshini.
UMobara uzibizele ulaka lukanompempe ngesikhathi eshaya omunye wabadlali beChippa ngebhola kungenasidingo.
Lesi sigameko senzeke emdlalweni wePremiership obuseMoses Mabhida Stadium ngoLwesibili ebusuku.
Lo mdlali wasesiswini ubecikwe wukuthi omunye wabadlali beChippa uhlabe owoSuthu phambi kwebhentshi labo, lasukuma lonke ibhentshi liyolwa.
Ngesikhathi kuhiliziswana, uMobara uthathe ibhola walikhahlela, lashaya kabuhlungwana omunye wabadlali beChippa, unompempe wamkhipha ngekhadi elibomvu.
Ukubuyela emdlalweni, amagoli Osuthu ashaywe oPule Ekstein noCelimpilo Ngema esiwombeni sokuqala kanti iChippa ayibange isakwazi ukubuya.
Lo mphumela uzobuyisa ukuzethemba kubadlali baMaZulu njengoba ubasuse emsileni okokuqala kule sizini.
Sekuhlezi iTS Galaxy emsileni ngemuva kokushayelwa ekhaya eMbombela Stadium yi-Orlando Pirates ngawo uLwesibili ebusuku.
Usuthu luzoba nekhefu elidana kusukela kule mpelasonto njengoba kudlalwa imidlalo yeCarling Knockout kanti lona lwaphuma emzuliswaneni wokuqala lushaywa yiStellenbosch FC.
Luyoze lubuyele enkundleni ngoNovemba 30 seluyobhekana nomakhelwane iRichards Bay FC eKing Zwelithini Stadium.
