‘Uthethisiwe’ oweBay ngokuzonela izinto
- Alfred NGUBANE
UBrandon Truter, ongumqeqeshi weRichard Bay FC useveze ukuthi umhlalele phansi umgadli wakhe osemncane, uYanela Mbuthuma, wameluleka ngokuziphatha.
Lokhu kulandela ukuthi uMbuthuma, ofakiwe eqenjini leBafana Bafana umqeqeshi azohlunga kulo, ethole ikhadi elibomvu ngoLwesibili.
Lo mgadli oneminyaka engu-22 ubudala ukhishwe ngesikhathi iRichards Bay ishaywa yiSekhukhune United emdlalweni weligi ePeter Mokaba Stadium.
Bekungakapheli nosuku emenyezelwe njengomunye wabagadli uHugo Broos ababeke iso ngenhloso yokubapika kwiBafana.
“Ngikhulumile naye ngimxwayisile ngokuthola ikhadi elibomvu, ngimtshela ukuthi akukuhle nhlobo kuyena ngoba siyamdinga kwiRichard Bay nakwiBafana Bafana,” kusho uTruter.
UTruter uphinde waveza ukuthi iqembu lakhe linobonda lwasemuva oluqinile kodwa phambili kusashoda.
“Ngenelisekile ngendlela esenza ngayo emuva ngoba asidedeli amagoli amaningi,” kusho uTruter.
“Kodwa kubagadli ngisakhala ngoba babuthuntu phambi kwamapali… yimpi engisalwa nayo ukuthi ngibacije ekutheni bahlohle amagoli.”
IRichards Bay izogadulisana neCape Town City eKing Zwelithini Stadium ngoMgqobelo ngo-3.30 ntambama emdlalweni weCarling Knockout.
Leli qembu likaTruter yilo lodwa kwawaKwaZulu-Natal elisasele kulo mqhudelwano odlalwa amaqembu esigaba esiphezulu sePSL.
