UHlungwani ushaya amakhala ngephenathi ye-Orlando Pirates
Owayengunompempe weSAFA, uVictor Hlungwani ushaya amakhala ngephenathi ebekelwe i-Orlando Pirates kwiBetway Premiership ngempelasonto edlule.
UHlungwani ukholwa ukuthi i-Orlando Pirates yenzelwe umusa ibekelwa iphenathi ngendlela engafanele ngesikhathi inqoba ngo 3-0 kwiMagesi FC ePolokwane.
I-Orlando Pirates inqobe ngamagoli kaPatrick Maswanganyi, uKamogelo Sebelebele no-Oswin Appollis – oshaye le phenathi ekhonondisayo.
Itholakale ngemuva kokuthi uSebelebele ewiswe esebhokisini, kodwa uHlunguni ugcizelela ukuthi bekungamele kuze kube yiphenathi.
“USebelebele unikezwe iphenathi. Kodwa ingabe ibekwe ngendlela efanele?” kusho uHlungwani kwiSoccer Zone.
“Kukhona isandla esimthintayo, kodwa ingabe sanele ukumqumba phansi? Impendulo ithi cha.”
Lo nompempe wangaphambili uchaze ukuthi ukuthintana kukodwa akwanele ukuthi kubekwe iphenathi.
“Othintana naye kumele kuqine, kumele kube nomthelela,” kwengeza yena.
“Ngakho lapha akuzange kube ngokwanele. Kodwa uSebelebele, ebona ukuthi usendaweni yephenathi, uvele wathatha amashansi, wayithola iphenathi.”
Njengoba umjaho wesicoco seBetway Premiership ushube kanje, lezi zinqumo ezisusa umsindo zengeza isinongo kwisizini evele inzima.
