Ufunelwa isikhala ezinkunzini zePSL umgadli waseBrazil
Umgadli wase-Brazil, uRaphael Lopes, uthungathelwa iqembu angase asayine kulo kwBetway Premiership ngesizini ezayo.
Lo mdlali oneminyaka engu-26 ubudala njengamanje udlalela iHamrun Spartans yaseMalta.
Inkontileka yakhe kuleli qembu iphela ngoJuni, kanti kuvela ukuthi abaphathi bakhe bamfunela eNingizimu Afrika.
I-Soccer Laduma ibika ukuthi uLopes uvulelekile ukuzodlala kwiPSL. Abaphathi bakhe kubikwa ukuthi bamfunela emaqenjini amathathu amakhulu kuleli — i-Orlando Pirates, iKaizer Chiefs, neMamelodi Sundowns.
ULopes ujoyine uHamrun ngonyaka odlule esuka ekilabhini yase-Brazil iCaldense.
Njengoba ikusasa lakhe e-Europe lingacacile njengamanje, abaphathi bakhe sebeqalile ukumdayisa emaqenjini ase-Afrika.
IPirates kuthiwa iyona ehamba phambili kulo mjaho wokusayina lo mgadli othembisayo.
Lezi zinkunzi zaseSoweto zithungatha umgadli kanti zisanda kuhlola umgadli waseZambia u-Andrew Phiri.
ULopes angase abe ngolandelayo ukuhlolwa kuleli qembu. Nokho okwamanje akukabi bikho okusemthethweni okukhona.
Kodwa kuvela ukuthi abaphathi bakhe bazimisele ukuthinta lamaqembu akuleli maduze nje.
ULopes kuthiwa uunejubane futhi unekhono elihle lokudlala okumenza abe nakho konke okudingeka kwiligi yakuleli.
Kuthiwa iqembu laseSudan i-Al Hilal lona selike labuza ngaye. Nokho kuvela ukuthi inhliziyo yakhe yena iseNingizimu Afrika.
“Lona ngumdlali osezingeni eliphezulu waseBrazil,” kusho umthombo. “Iphrofayili yakhe ifanelekile kwi-PSL.
“Angaba ngumdlali ozoqinisa kahle kunoma yiliphi iqembu elizogcina limamukelile.”
IKaizer Chiefs nayo ingase imgxumele lo mgadli njengoba seyikuqinisekisile ukuthi seyizobabheka ngaphandle kwakuleli abadlali ezoqinisa ngabo.
Lokhu kulandela ukuthi amaqembu akuleli ehudula izinyawo uma ifuna ukudayiselwa abadlali.
