Udlelwa imizi uKhama Billiat wodumo kwiChiefs
Umdlali wodumo kwiKaizer Chiefs uKhama Billiat ubhekene nengwadla yokulahlekelwa ngomunye wemizi yakhe kanokusho eGoli.
Lokhu kulandela izinsolo zokuhluleka ukukhokhela nokukweleta ibhondi ayithatha ngo-2021.
Ngokwamaphepha asenkantolo, i-Emerging Markets Home Loans (EMHL) iye eNkantolo eNkulu yaseGoli ifuna ukunikwa igunya lokudla impahla yalo mdlali oneminyaka engu-35 ubudala.
Le nkampani ithi yaboleka uKhama Billiat imali engaphezudlwana kuka-R1 million ngoMashi 2021 ukuze athenge umuzi kanokusho eKyalami.
Kodwa-ke, kusolakala ukuthi wagcina esehluleka ukukhokha kusukela ngoFebhuwari 2024.
“Ummangalelwa wephule isivumelwano ngokwehluleka ukwenza izinkokhelo ezifanele nangesikhathi esifanele,” kusho i-EMHL emaphepheni asenkantolo.
Ngesikhathi kukhishwa amasamanisi ngoMashi 2024, uKhama Billiat kubikwa ukuthi ubekweleta imali engaphezu kuka-R100 000.
Kanti sesisonke isamba semali esisasele kulesi sikweletu sakhe sisadlula ku-R1 million.
Naphezu kokwelulekwa ukuthi akhokhe lesi sikweletu, i-EMHL ithi akukho nkokhelo eyenziwe.
Lesi sivumelwano sabe sesihoxiswa, kanti le nkampani manje seyifuna sikhokhwe sonke isikweletu — okubikwa ukuthi sesikhuphuke saba ngaphezu kuka-R1.4 million.
UKhama Billiat uke wadlala kwiMamelodi Sundowns ne-Ajax Cape Town esikhathi sakhe kuleli.
Njengamanje usekwelakubo eZimbabwe la edlala khona kwiScottland ayijoyine kule sizini.
Kuthiwa unezindawo eziningi eSummerset Village, zonke ezisengcupheni yokudliwa uma engakwazi ukukhokha le mali ayikweletayo.
