UGoss uveza okuphazamise iSundowns e-Angola
Unozinti weMamelodi Sundowns, u-Ricardo Goss, usole isimo senkundla esenze bahluleka ukudlala ibhola abalijwayele ngesikhathi bebambana ngo 0-0 neWiliete e-Angola ngeSonto.
ISundowns ibhekane neWiliete e-Estadio Nacional da Tundavala emdlalweni womlenze wokuqala womzuliswano wesibili wokuhlungela iCaf Champions League.
Izinkunzi zaseTshwane zihlulekile ukuthola indlela yokudlula odongeni lwasemuva lweWiliete, umdlalo waphela kungekho qembu elikwazile ukushaya igoli.
UGoss, oqale umdlalo esikhundleni sikaRonwen Williams olimele, uvumile ukuthi bekungumdlalo onzima.
“Bekungumdlalo onzima. Kusobala ukuthi bayiqembu elikhulu lapha.
“Futhi ngicabanga ukuthi bahamba phambili kwiligi yabo,” kusho uGoss.
U-Ricardo Goss uqhube ngokuthi imvula ngaphambi komdlalo ibe nomthelela endleleni iMamelodi Sundowns edlale ngayo.
“Kodwa nesimo senkundla asisisizanga, njengoba bekunemvula ngaphambi komdlalo.
“Nokho, ngicabanga ukuthi singawuthatha lo mphumela ka-0-0 siye nawo eLoftus,” kuqhuba yena.
ISundowns isizodinga ukunqoba phambi kwabalandeli bayo ngoLwesihlanu ukuze ithole indawo esigabeni samaqoqo kulo mqhudelwano.
Lezi zinkunzi zaseTshwane, ezingompetha abavikela isicoco seCaf Champions League, zizimisele ngokugcina le ndebe yazo, kodwa manje sekumele zikhombise lokho emdlalweni ozayo.
U-Ricardo Goss ubuyele kwiMamelodi Sundowns ngesikhathi kuphela isivumelwano sakhe sokubolekiswa kwiSiwelele FC.
Selokhu ebuyile, usebonakale emidlalweni emibili kuyo yonke imiqhudelwano futhi ufisa ukuthola amathuba engeziwe njengoba imidlalo iqhubeka nokwanda.
- FUNDA NALA | UPupuma usebenza kusakhanya khona ezothatha ikhefu
ISundowns izobe inethemba lokuthi uWilliams no-Aubrey Modiba bazobe sebekulungele ukudlala ngemuva kokuphuthelwa wuhambo oluya e-Angola.
Kukhona nokukhathazeka ngoTeboho Mokoena, ophume enkundleni ethwelwe ngemuva kokulimala.
- EZISHISAYO!| Cofa lapha usithole kuWhatsApp
