UCardoso ubonga isibindi kwabeDowns ‘engavimbeki’
- Intatheli yeLISENETHINI
Umqeqeshi weMamelodi Sundowns uMiguel Cardoso ugqamise isidingo sokuthuthuka okuqhubekayo.
Lokhu ukuveze ngemuva kokunqoba kweqembu lakhe ngo 2-0 kwiRichards Bay emdlalweni weBetway Premiership ngoMgqibelo.
Amagoli ka-Arthur Sales esiwombeni sokuqala nelikaLucas Ribeiro Costa kwesesibili yiwo aweze iSundowns eKing Zwelithini Stadium.
ISundowns ibiwuphethe umdlalo futhi ibe namathuba okushaya amanye amagoli amaningi kulo mdlalo.
Lokhu kunqoba kubeka iSundowns esicongweni seBetway Premiership ngamaphuzu angu-30 emidlalweni engu-11.
Ihola i-Orlando Pirates ngamaphuzu amathathu, nakuba iPirates inemidlalo emibili esayigodle ekhwapheni futhi izobhekena neMagesi FC ngeSonto.
UCardoso uncome abadlali bakhe ngokuzibophezela kwabo ezimeni ezinzima.
“Kubalulekile ukusebenzisa izikhathi zakho ngendlela efanele yize besingenza kangcono,” kusho yena ngemuva komdlalo.
“Futhi ngincoma abadlali ngemizamo yabo nokuzibophezela, ngesimo sengqondo, kanye nesibindi sokuqhubeka nokudlala ezimeni ezinzima kakhulu.”
Uzivumile izinselelo zokucindezela izimbangi ezidlala ibhola eliqondile.
“Sidinga futhi ukuqonda ukuthi lesi simo singaba nzima kangakanani kubo.”
Ngaphansi kweCardoso, iSundowns isayinqobe yomine imidlalo yayo kuyo yonke imiqhudelwano ngaphandle kokungenelwa yigoli.
Iqembu manje selishintshela kwiCaf Champions League, lapho lizobhekana khona neRaja Casablanca ngoJanuwari 4.
“Manje sizovala umnyango weligi, sivule umnyango we-Caf Champions League,” kwengeza yena.
“Manje kufanele silulame, sibone ukuthi ubani ozoba sesimweni esingcono kakhulu sokudlala ngaye emdlalweni olandelayo.”
