Ubumnandi, yebo. Iwini, dololo koweChiefs neDowns

I-Kaizer Chiefs neMamelodi Sundowns badlale ngokulingana ngo-1-1 emdlalweni weBetway Premiership eFNB Stadium ngoMgqibelo ntambama.

Abalandeli abangaphezu kuka-80 000 babone umdlalo obushubile, onezikhathi eziningi ezijabulisayo.

Womabili amaqembu akhe amathuba kodwa ahluleka ukuthola igoli lokunqoba. IChiefs ishaye igoli lokuqala ngomzuzu ka-64.

USiphesihle Ndlovu untshontshe ibhola kuKegan Johannes wangena ebhokisini.

Ube eseliphakela uLangelihle Phili, lo mdlali omusha akangabe esananaza, walibeka enethini.

ISundowns ibuyele emdlalweni ngomzuzu ka-76. UCassius Mailula, obesanda kungena, ukwazile ukugxuma angqofe ibhola phambi kukanozinti weChiefs.

Womabili amaqembu aqhubekile nokufuna igoli lokuwina. UBennett Mokoena ucishe walithola ngesikhathi esengeziwe.

Ibhola lakhe lishaye phezulu kwepali ladlula ngaphandle.

USiyanda Ndlovu naye ucishe walishaya kodwa ibhola lakhe laphuma phezu kwepali ngesikhathi i-Kaizer Chiefs neMamelodi Sundowns babambana ngo 1-1.

Leli phuzu lishiya iChiefs ihlezi phezulu kwiBetway Premiership ngamaphuzu ayisikhombisa emidlalweni emithathu.

ISundowns yona inamaphuzu amane emidlalweni emibili.

• FUNDA NALA | Ezinhle nezimbi ngabalimele kwiBucs

Nokho, i-Kaizer Chiefs isiqede imidlalo engu-10 ilandelana ingakwazi ukushaya iMamelodi Sundowns emidlalweni yeligi.

Ukunqoba kokugcina kweChiefs kulo mdlalo kwaba ngo-Ephreli 2021.

• EZISHISAYO| Cofa lapha usithole kuWhatsApp