Ezinhle nezimbi kwiPirates ngaphambi koweChippa 

I-Orlando Pirates isikhiphe isibuyekezo esimqoka ngabadlali bayo ngaphambi komdlalo weBetway Premiership la izobhekana khona neChippa United.

Lo mdlalo uzoba ngeSonto ngo-3 ntambama eKings Park Stadium eThekwini kanti iPirates izobe ingenabo oThalente Mbatha no-Evidence Makgopa.

Laba badlali bobabili bazophinde baphuthelwe wumdlalo ngenxa yokulimala.

USihle Nduli naye akucaci ngaye ngemuva kokuphuma eselimele emdlalweni naMaZulu kuyo le nkundla ngoLwesithathu.

Lezi yizindaba ezimbi kwiPirates njengoba izama ukubuyela emqgigqweni ngemuva kokudlala ngokulingana ngo-1-1 noSuthu.

Nokho, zikhona nezindaba ezinhle ekhempini yeBuccaneers.

UKabelo Dlamini noMasindi Nemtajela sekuseduze babuyele ekudlalweni futhi bahambe neqembu ukuya eThekwini.

Umgadli omusha we-Orlando Pirates uSebastian Pedersen naye usekhona futhi anganikeza leli qembu lika-Abdeslam Ouaddou okwehlukile kwindlela elihlasela ngayo.

Omunye ungadli okhona ngaphandle kukaYanela Mbuthuma noBoitumelo Radiopane nguSifiso Luthuli.

IPirates inamaphuzu amane emidlalweni emibili yokuqala yeBetway Premiership.

Umdlali wasemuva wePirates uNkosikhona Ndaba uthi iqembu kumele lithuthukise indlela elisebenzisa ngayo amathuba eliwkhayo.

“Ngikholwa ukuthi uma singathuthukisa ukuqedela amathuba futhi sisebenzise amathuba esiwakhayo, singayinqoba imidlalo eminingi,” kusho lesi sitobha.

• FUNDA NALA | UDa Cruz uveza umehluko kwiChiefs neDowns

I-Orlando Pirates isiwine imidlalo emihlanu ilandelana yeligi ibhekene neChippa.

Lo mdlalo wangeSonto uzoqala ngo-3 ntambama eKings Park Stadium kanti amathikithi adayiswa eTIcketPro nasezitolo zakwSpar noJet.

• EZISHISAYO| Cofa lapha usithole kuWhatsApp