Ezintsha ngabadlali abangase bashintshe amaqembu
- Intatheli yeLISENETHINI
Amanye amathalente aphezulu amaqembu ePSL angase alibangise phesheya njengoba sanda isibalo sabadlali abakhonjwa e-Europe.
IKaizer Chiefs ne-Orlando Pirates kuvela ukuthi kumanje bahlanganisa izingxoxo zokuqinisa amaqembu abo ngoJanuwari.
Inhloso wukunyusa izinga ukuze bakwazi ukumelana neMamelodi Sundowns esiphenduke uGoliyathi ebholeni lakuleli.
ULucas Ribeiro Costa, umdlali weSundowns, kubikwa ukuthi ufunwa yiBurnley FC yase-England.
Kodwa-ke, uRibeiro kulindeleke ukuthi alizibe leli qembu ngenhloso yokulinda elinye iqembu elikhulu.
URelebogile Mofokeng, ongumdlali wasesiswini we-Orlando Pirates, usedonse amehlo emaqenjini aphezulu ase-Europe, okubalwa iBarcelona, iGlasgow Rangers, neRB Leipzig.
IKaizer Chiefs isivuselele intshisekelo yayo kuKhanyisa Mayo, okumanje ukwizikhondlakhondla zaseTunisia i-Esperance.
UMayo useke wazwakalisa isifiso sakhe sokulandela ezinyathelweni zikayise ayodlalela iChiefs.
Ukungaqiniseki kwesimo kwi-Esperance, kulandela ukushiya komqeqeshi uMiguel Cardoso osejoyine iSundowns, kungavula umnyango wokuthi uMayo abuye.
AmaBhakabhaka aphinde amataniswe nomgadli weGolden Arrows uLungelo Nguse. Khonamanjalo, iPirates neChiefs kuthiwa basembangweni kaMuzomuhle Khanyi, ongumgadli weHungry Lions FC.
Kuphinde kuvele nokuthi iPirates sekusele amathizethize ukuthi ithole abadlali ababili bePolokwane City uThabang Matuludi no-Oswin Appolis.
Iwindi lokudayiselana ngabadlali ngoJanuwari lithembisa ukuletha isasasa njengoba amakilabhu ebheke ukuqinisa izikwati zawo.
