UModise nesexwayiso kuBasadien ngezinga kwiDowns
Owayengumdlali weMamelodi Sundowns, u-Teko Modise, useveze ukukhungatheka kwakhe ngo-Fawaaz Basadien athi kumele anyuse amasokisi ukuze azinze kuMasandawana.
UBasadien uthole amathuba ambalwa okudlala ngesizini edlule waze walahlekelwa yindawo yakhe kwiBafana Bafana.
Udlale imidlalo engu-11 kuphela kuyo yonke imiqhudelwano.
Lo mdlali oneminyaka engu-29 ubudala useqale imidlalo emibili kule sizini.
Uqale umdlalo weMTN8 nePolokwane City nowokuvula weBetway Premiership neTS Galaxy.
Nokho akazange adlale futhi ubengekho nasebhentshini ngesikhathi iSundowns ibambana ngo 1-1 neKaizer Chiefs ngoMgqibelo.
U-Teko Modise ukholwa ukuthi u-Fawaaz Basadien unekhono elihle futhi angaba nempumelelo enkulu hhayi kwiSundowns nje kuphela.
Nokho, uthi kumele athuthuke kwindlela avala ngayo emuva futhi alwe kanzima ukuze athole indawo phambi kuka-Aubrey Modiba noDivine Lunga.
“Sinabadlali abakwazi ukuzithathela izinqumo enkundleni,” kusho uModise ku-The Pitchside Podcast yeSundowns.
“Kuyajabulisa ukubona enikwa inkululeko yokudlala ibhola elihle.
“Ngifuna ukumbona ekhula. Kumele adlale kangcono. Usebe kwiSundowns isikhathi esingaphezu kwesizini futhi manje sekuyithuba lakhe.”
UModise uthe sekuyisikhathi sokuthi uBasadien alwele indawo yakhe eqenjini.
“Kumele aqinise ukuncintisana phakathi kwakhe, uLunga noModiba,” kuqhuba yena.
“Ukhululekile kakhulu uma ephethe ibhola. Akumele sikubone ngezikhathi ezithile kuphela.
“Ngiyamazi futhi ngiyazi ukuthi uyakwazi. Udinga nje ukubamba umgqigqo owodwa.
“Uma ukwiSundowns, isikhala sokwenza amaphutha sincane ngoba kukhona ozongena adlale kangcono.
“Sifuna ukubona okuningi kulokho. Muhle nasemabholeni abekwe phansi futhi unonyawo lwesokunxele oluhle.”
- FUNDA NALA | UMbule uqale kahle e-Iraq
U-Fawaaz Basadien usembangweni oshubile wendawo kwiSundowns, futhi u-Teko Modise umbona engakwazi ukuba ngumdlali omqoka uma nje enganyusa amasokisi.
- EZISHISAYO| Cofa lapha usithole kuWhatsApp
