UChaine uphawula ngokuqhathaniswa noSenzo Meyiwa
Unozinti we-Orlando Pirates, u-Sipho Chaine, ukuchithile ngokuzithoba ukuqhathaniswa nezingwazi zeqembu u-Senzo Meyiwa noMoeneeb Josephs.
UChaine uqophe igama lakhe emlandweni wePSL ngemuva kokungangenelwa goli emidlalweni engu-21 yeligi.
Lo nozinti oneminyaka engu-29 ubudala udlale indima enkulu njengoba iPirates iqede indlala yeminyaka engu-14 yesicoco seBetway Premiership.
Leli qembu belikade livele linqobe iMTN8 neCarling Knockout ngasekuqaleni kwesizini.
Kodwa phezu kobuqhawe bakhe phakathi kwamapali, u-Sipho Chaine Chaine ugcizelela ukuthi usazibona esengumfana omncane waseBloemfontein.
“Kuwumuzwa okhethekile ukumela le kilabhu,” kusho uChaine.
“Abantu bahlale bebuza ukuthi ngizibona kuphi phakathi konozinti abeze phambi kwethu, kodwa ezinye izinto ziyigugu.
“Awukwazi ukuziqhathanisa nabantu okhule ubukela kubo, ufisa ukufika ezingeni labo.”
U-Sipho Chaine uvumile ukuthi ukuzwa eqhathaniswa nenkunzi u-Senzo Meyiwa ongasekho noMoeneeb Josephs yinto emthobayo.
“MIna ngisazibona ngingumfanyana waseBloemfontein obukela ku-Senzo Meyiwa no-Moeneeb Josephs.
“Ukungena ezicathulweni zabo kuyinto ekhethekile kakhulu,” kwenanela yena.
UChaine uqede isizini engangenelwanga goli emidlalweni engu-25 emidlalweni engu-39 kuyo yonke imiqhudelwano.
Lokhu kuqinise indawo yakhe njengomunye wabadlali ababalulekile bale kilabhu ngesikhathi somkhankaso oyingqophamlando.
Yize enze ngendlela emangalisayo, indawo yakhe eqenjini leBafana Bafana eliya kwiNdebe yoMhlaba ayiqinisekisiwe.
