UWilliams emkhankasweni wePowerade
Inkampani yeziphuzo iPowerade isimemezele ngokusemthethweni ubudlelwano nonozinti ongukaputeni weBafana Bafana, u-Ronwen Williams.
UWilliams uqokwe njengobuso bomkhankaso wePowerade eNingizimu Afrika, eyingxenye yomkhankaso womhlaba wonke obizwa nge-“Power Your Fate.”
Lo mkhankaso wethulwe yiCoca-Cola Company ngaphambi kweNdebe yoMhlaba ka-2026.
Ugxile ekubekezeleni, ekusebenzeni kanzima nasekulungiseleleni ngokuzimisela, ukhuthaza umqondo wokuthi impumelelo awuyiphiwa muntu, kodwa uyayisebenzela.
Lokhu kuhambisana kahle nohambo luka-Ronwen Williams, osezakhele igama ngokunqoba izinselelo nokwenza kahle ngaphansi kwengcindezi enkulu.
UWilliams usejoyine izihlabani zebhola ezifana noLamine Yamal waseSpain noRodrygo Goes waseBrazil, nabo abayingxenye yalo mkhankaso womhlaba.
“I-‘Power Your Fate’ imayelana nokuthatha isinqumo sokulwela amaphupho akho nokusebenza kanzima ngisho noma kungekho okubukayo.
“Yilokho okwakhe umsebenzi wami webhola, futhi ngiyaziqhenya ngokusebenzisana nePowerade ukukhuthaza abantu baseNingizimu Afrika ukuthi bakholelwe emandleni abo,” kusho uWilliams.
Ukuze kugujwe lobu budlelwano, iPowerade iphinde yethula isiphuzo esisha esilinganiselwe eNingizimu Afrika, i-Powerade Outlast.
Lesi siphuzo sakhelwe ukusiza abasubathi ukuthi babuyise amandla omzimba nengqondo ngesikhathi beziqeqesha kanzima nasemidlalweni enengcindezi enkulu.
- FUNDA NALA | Isikhulu seFifa sicacisa ngegoli le-Egypt
Iphini likamengameli nomqondisi ophethe iCoca-Cola South Africa, uMario I. Garcia, uthe ukusebenzisana noWilliams kukhombisa ukuzibophezela kwenkampani ekwesekeni abasubathi nabalandeli baseNingizimu Afrika ukuze bafinyelele ezingeni eliphezulu.
Kulindeleke ukuthi umkhankaso ka-Ronwen Williams ubonakale kakhulu ezinkundleni zokuxhumana, emabhodini ezikhangiso ezweni lonke.
- EZISHISAYO|Â Cofa lapha usithole kuWhatsApp
