USamir Nurković useyifuna kwiSafa nePSL ayikweletwa yiRoyal AM
Owayengumgadli weRoyal AM, uSamir Nurković, useluqale phansi udaba lokukweletwa kwakhe, kanti kulokhu ubopha iSouth African Football Association (Safa) nePremier Soccer League (PSL).
Ufuna u-R15 million wamaholo angakhokhelwanga wona yiqembu likaShauwn Mkhize lisadlala kwiPSL.
Lo mgadli waseSerbia, osedlalela iSiwele FC, uthi zombili lezi zinhlangano zehlulekile emsebenzini wazo wokulawula.
Uthi behlulekile ukuphoqelela izinqumo eziningi ezakhishwa zidla iRoyal AM ngaphambi kokuthi le kilabhu iqedwe.
UKUHLULEKA
Isisekelo sesikhalazo sikaSamir Nurković wukuthi lezi zinhlangano kwakumele zishaqe impahla yeRoyal AM ukuze akhokhelwe imali yakhe.
Phakathi kuka-Ephreli 2023 noJanuwari 2025, lo mgadli uthole izinqumo ezine ezibophezelayo ezivuna yena kwiFifa neCourt of Arbitration for Sport (Cas).
Naphezu kwalezi zinqumo , iRoyal AM ayizange isikhokhe isikweletu. Ithimba lezomthetho likaNurković lkhala ngalokhu:
- Ukunganaki kweSafa: Ngaphansi kwemithetho yeFifa, izinhlangano zikazwelonke kumele ziqinisekise ukuthi amakilabhu angamalungu ayahambisana nezinqumo zamazwe ngamazwe.
Abameli bathi ukungasebenzi kweSafa kwehlisa igunya lomhlaba wonke leFifa. - Ukudembesela kwePSL: I-PSL kusolakala ukuthi yenqabile ukudonsa emalini yesibonelelo sanyanga zonke seRoyal AM ukuze kukhokhwe le mali yakhe.
UFUNA U-R15 MILLION
Njengoba iRoyal AM ingasekho, uSamir Nurković ufuna ukubuyiselwa imali yiSafa nePSL.
“Lolu daba seludlula ingxabano yenkontileka,” kusho abameli bakhe esithulweni sabo enkantolo njengoba ngokubika kweSABC Sport.
Baphikisa ngokuthi ukwenqaba kwePSL ukwenza okuthile, naphezu kokuthi iRoyal AM yaphakamisa indlela efanayo yokudonswa kwemali ngokwayo, ikhomba ukudembesela.
FUNDA NALA | Kucaciswa ekaPetersen ongekho kweleChiefs kwidabhi
Leli cala libeka isibonelo esikhulu samalungelo abadlali eNingizimu Afrika.
Uma uSamir Nurković ephumelela, kungase kudle iSafa nePSL imali bese kuvuka namanye amacala amadala abadlali abagcina bekweletwa.
