UKhune ufanisa uMakgopa nowayengumgadli weChiefs
U-Itumeleng Khune usefanise umgadli we-Orlando Pirates neBafana Bafana u-Evidence Makgopa nomunye wozakwabo bakudala kwiKaizer Chiefs.
Le nsizwa ebingunozinti weBafana Bafana isingumhlaziyi kwiSABC Sport futhi uveze lokhu ngesikhathi besakaza umdlalo weBafana neGhana ngoLwesibili.
IBafana ishaye iGhana ngo 1-0 emdlalweni wayo wokugcina wokuzilungiselela ngaphambi kwe-Africa Cup of Nations eseMorocco kusuela ngoDisemba 21.
Ekhuluma ngesitayela nomthelela ka-Evidence Makgopa eqenjini, u-Itumeleng Khune uthe umkhumbuza uzakwabo wakudala kwiChiefs uKingston Nkatha.
UKhune udlale nalo mgadli weZimbabwe kwiChiefs phakathi kuka-2012 no-2015 lapho uNkatha ashaya khona amagoli angu-16 emidlalweni engu-69.
UNkatha ubengathandwa ngabalandeli baMakhosi ngokungabi bukhali kangako phambi kwepali.
UMakgopa yena usephenduke ingxenye ebalulekile yokuhlasela kwePirates neBafana, kodwa kwesinye isikhathi uzithola egxekwa ngokushoda kwamagoli.
Nokho uKhune ukholwa ukuthi laba bagadli bobabili kungenzeka bangabi bukhali ebhokisini kodwa banento eyodwa abafana ngayo.
Uthi babalulekile emaqenjini abawadlalelayo ngokuthi bayakwazi ukukhathaza abadlali basemuva nokuvulela ozakwabo izikhala zokuhlasela.
“Uyazi ukuthi u-Evidence Makgopa ungikhumbuza bani? UKingston Nkatha,” kusho u-Itumeleng Khune kuSABC 2 ngesikhathi somdlalo weBafana.
“Abalandeli beKaizer Chiefs babehlezi bemgxeka. Babengazi ukuthi ubaluleke kangakanani kithi.
“Wayevame ukukhathaza abadlali basemuva ngokubagijisa umlibe futhi abadonsele eceleni.
“Ngangivame ukumthumelela amabhola amade ngemuva kwezitobha, ukuze abagijimise. Ngomzuzu ka-60 abadlali basemuva babesuke sebekhathele.
“Kwakube sekufakwa uLehlohonolo Majoro endawnei yakhe ukuzoqeda umsebenzi.”
FUNDA NALA | UBaartman uphawula ngokudlala okokuqala kwiChiefs
U-Evidence Makgopa uqokwe kwiBafana ngaphambi kuka-Iqraam Rayners okushiye abalandeli abaningi bengabaza lesi sinqumo. Babona uRayners ungumgadli obukhali.
ZITHOLE ZISHISA: Cofa lapha usithole kwiWhatsApp Channel yethu
