OwePirates uveza ‘okuvuselele’ uMbuthuma
Umqeqeshi we-Orlando Pirates, u-Abdeslam Ouaddou, usencome abalandeli baleli qembu baseThekwini ngokuvuselela umfuthi ka-Yanela Mbuthuma.
Abalandeli bazwakale becula igama likaMbuthuma emidlalweni emibili yePirates eKings Park Stadium ngesonto eledlule.
Lokhu kwenzeke ngesikhathi lo mgadli ebhekene nokugxekwa okukhulu ngenxa yokuhluleka ukusebenzisa amathuba abewatholile.
UMbuthuma usayidlale yonke imidlalo yePirates kule sizini, kodwa akakaze alithole igoli.
Nokho, u-Ouaddou uthi abalandeli baseThekwini benze umehluko omkhulu kulo mgadli oneminyaka engu-24 ubudala.
Uthi ubone u-Yanela Mbuthuma edlala ngokuzethemba ngesikhathi i-Orlando Pirates icoboshisa iChippa United ngo 3-0 ngeSonto.
“Uma ngibheka uMbuthuma njengomqeqeshi, wenza umsebenzi omuhle kakhulu eqenjini,” kusho u-Ouaddou.
Uthe nakuba efuna ukuthi lo mdlali asebenze kangcono phambi kwamapali, akumele aqedwe ukuzethemba ngenxa yesikhathi esinzima.
“Nakanjani ngiyafuna ukumbona enza kangcono phambi kwepali,” kuqhuba lo mqeqeshi.
“Kodwa lokho akusho ukuthi kumele simbulale lo mdlali omuhle kanjena uma izinto zisamphika.
“Unekusasa elihle kwiPirates. Kumele simeseke futhi ngiyababonga kakhulu abalandeli baseThekwini ngabamenzele khona namuhla.
“Kube wumlayezo omuhle kakhulu kuye futhi umbonile naye ubezethemba ngenxa yomlayezo obuqhamuka kubalandeli.
- FUNDA NALA | UDa Cruz uveza asafuna uPhili aphucuke kukho
“Kufanele kube kanjalo ke uma sithi seseka iqembu,” kwengeza lo mqeqesho odabuka eMorocco.
- EZISHISAYO| Cofa lapha usithole kuWhatsApp
