UBig Zulu uyaxolisa ngevidiyo ehlaza uMbokazi weBucs
Uthole ukugxekwa okukhulu umculi wakuleli, u-Big Zulu, esolwa ngokudukisa abafana abancane abadlala ibhola.
Lokhu kulandela ukuvela kwenye ividiyo la ebonakala ehlezi khona nomdlali we-Orlando Pirates uMbekezeli “TLB” Mbokazi.
Kule ndawo abahlezi kuyo kukhona utshwala obugcwele itafula namantombazane okuyinto abadlali bebhola okufanele badlalele kude nayo.
Bekubizwa nengoma kumnandi kudelile. Bese kungokwesibili ke u-Big Zulu ebonakala enza lento nabadlali.
Ngonyaka odlule wasolwa kakhulu ngemuva kokubonakala eboSibongiseni “Ox” Mthethwa weKaizer Chiefs esimweni esifanayo.
Okwacika abalandeli kakhulu wukuthi uMthethwa wayelimele ngaleso sikhathi, kodwa wabonakala esehlaba ingoma.
Kulokhu uBig Zulu ubenoMbokazi – umdlali wasemuva osemncane obukeka enekusasa elihle kakhulu uma ezogwema ukuba sezimweni ezinjengalezi.
Umthombo osondelene noMbokazi okhulume neLisenethini ukhale ngokuthi u-Big Zulu uze wanikwa indondo yeMTN8 abonakale eyigaxile kule vidiyo.
Ukhale ngokuthi le ndondo ayikafiki ngisho ekhaya kubo uMbokazi ukuthi ibonwe ngugogo wakhe omkhulisile nomalume bakhe.
Nokho lo mculi usexolisile, wathi uMbokazi ubehamba nabangani bakhe, wabe esebona uBig Zulu noQuality Biyela bezihlalele wabe esedlula ebingelela.
“Ngixolise ukunibhalela sekuhlwile,” kubhala lo mculi ngoLwesibili ebusuku.
“Ngiyabona la ezinkundleni zokuxhumana kusabalale ividiyo la sinabamfwethu sivuma khona ingoma, kukhona notshwala etafuleni.
“Cha iqiniso lithi icala likhona futhi likhulu impela. Ngendlela okuvela ngakhona kwividiyo kube nobudedengu obukhulu kwabanye babafowethu.
“Sicela ukudlulisa ukuxolisa kakhulu. Umf’wethu uTLB empeleni cha akanacala. Bebekade bedlula esitolo ebesikuso base besibona ngaphakathi.
“Ube esesondela nezinsizwa abehamba nazo bebingelela bathola thina sizivumela ingoma wabe naye esevuma kancane ngoba phela usinga luyavuka.
“Angizange ngimbone ephuza. Cha angizange nhlobo, uvume nje ingoma kancane base bephuma behamba.
FUNDA NALA | UMoreni uthembisa lukhulu kwiPirates
“Kodwa ngicela ukudlulisa ukuxolisa kakhulu ngendlela okwenzeke ngakhona ngoba kube nobudedengu nesibonelo nje esingesihle.
“Sicela ukudlulisa uxolo, siyazithoba nje kakhulu. Siyaxolisa kubathandi bezemidlalo nasemndenini nakuwo wonke nje umuntu. Siyaxolisa kakhulu.”
